امباتی رائیڈو کا یوٹرن

عالمی کپ ٹیم سے نظر انداز کئے جانے کے بعد اچانک کرکٹ کے تمام فارمیٹ سے ریٹائرمنٹ کا اعلان کرنے والے بھارتی بلے باز امباتی رائیڈو نے اپنا فیصلہ واپس لیتے ہوئے حیدرآباد ٹیم کی جانب سے کھیلنے کی خواہش ظاہر کی ہے۔

رائیڈو نے حیدرآباد کرکٹ ایسوسی ایشن (ایچ سی اے) کو خط لکھ کر کہا ہے کہ وہ حیدرآباد ٹیم کے لیے دوبارہ کھیلنا چاہتے ہیں۔

اس سے قبل رائیڈو نے حال ہی میں کہا تھا کہ وہ انڈین پریمیئر لیگ (آئی پی ایل) کے اگلے سیزن میں چینئی سپر کنگز کی جانب سے کھیلیں گے اور اسی کے بعد سے ان کے ریٹائرمنٹ واپس لینے کی قیاس آرائی نے زور پکڑ لیا تھا۔

واضھ رہے کہ رائیڈو کا نام عالمی کپ ٹیم میں اضافی کھلاڑی کے طور پر شامل کیا گیا تھا لیکن شکھر دھون اور وجے شنکر کے زخمی ہونے کے بعد بھی انہیں ٹیم میں جگہ نہیں دی گئی تھی اور ان کی جگہ رشبھ پنت اور مینک اگروال کو ٹیم میں شامل کیا گیا تھا جس کے بعد انہوں نے مایوس ہو کر کرکٹ کے تمام فارمیٹ سے ریٹائرمنٹ لینے کا فیصلہ کیا تھا۔

امباتی رائیڈو نے حیدر آباد کرکٹ ایسوسی ایشن کو خط لکھ کر کہا کہ میں آپ کے ذہن میں یہ بات لانا چاہتا ہوں کہ میں اپنا ریٹائرمنٹ کا فیصلہ واپس لیتے ہوئے کرکٹ کے تمام فارمیٹ میں کھیلنا چاہتا ہوں۔

ایچ سی اے کے سی ای او نے بیان جاری کر کے کہا کہ امباتی رائیڈو نے اپنا ریٹائرمنٹ واپس لیتے ہوئے خود کو ایچ سی اے کے لیے سال 2019-20 میں محدود اوورز کے کھیل کے لیے دستیاب رکھا ہے۔

رائیڈو نے ایک ای میل میں کہا کہ میں چینئی سپر کنگز، وی وی ایس لکشمن اور نول ڈیوڈ کا شکریہ جنہوں نے میرے خراب وقت میں میرا ساتھ دیا اور یہ احساس کرایا کہ ابھی مجھ میں کافی کرکٹ باقی ہے اور میں نے یہ فیصلہ جلدبازی میں جذباتی ہو کر لیا ہے۔

امباتی رائیڈو نے مزید کہا کہ میں حیدرآباد ٹیم کے میں شامل ہونے کے لیے بے قرار ہوں اور 10 ستمبر سے ٹیم سے منسلک ہوجاؤں گا۔

امباتی رائیڈو

رائیڈو کے فیصلے پر ڈیوڈ نے کہا کہ یہ فیصلہ آسان نہیں تھا اور اپنی غلطی سدھارنے کے لیے بہت جرات کی ضرورت ہوتی ہے، میں رائیڈو کے ریٹائرمنٹ لینے کے بعد واپس آنے کے فیصلے سے بہت خوش ہوں۔

انہوں نے کہا کہ مجھے لگتا ہے کہ ان میں اب بھی کافی کرکٹ ہے اور مجھے پورا یقین ہے کہ وہ حیدر آباد کرکٹ کے لیے سود مند ثابت ہوں گے۔

امباتی رائیڈو

ڈیوڈ نے کہا کہ میں نے رائیڈو سے بات کی اور انہیں سمجھایا نیز ان سے کہا کہ ان کے پاس ابھی کرکٹ کو دینے کے لیے بہت کچھ ہے۔

انہوں نے کہا کہ میں رائیڈو کو کافی وقت سے جانتا ہوں وہ نہ صرف ایک اچھے کھلاڑی ہیں بلکہ ایک بہترین انسان بھی ہیں۔ مجھے خوشی ہے کہ وہ ایک مرتبہ پھر سے ریاستی ٹیم کے لیے کھیلیں گے۔