جڈیجہ کی طوفانی اننگز کی بدولت چنئی کی کولکتہ پر شاندار جیت

آئی پی ایل 14 کے 38 ویں میچ میں چنئی سُپر کنگز نے کولکتہ نائٹ رائیڈرس کو 2 وکٹ سے شکست دے کر پوائنٹس ٹیبل میں پہلے مقام پر پہنچ گئی ہے۔

چنئی سُپر کنگز کے آل راونڈر رویندر جڈیجہ کی آٹھ گیندوں پر 22 رنز کی طوفانی اننگز کی بدولت چنئی سپر کنگز (سی ایس کے ) نے آج آئی پی ایل 14 کے 38 ویں میچ میں کولکتہ نائٹ رائیڈرس (کے کے آر) کو دو وکٹوں سے شکست دے دی۔

کولکتہ نے ٹاس جیت کر پہلے بلے بازی کرتے ہوئے 20 اوورز میں چھ وکٹ کے نقصان پر 171 رنز کا چیلنجنگ اسکور بنایا۔ جواب میں چنئی نے شروعات میں ٹاپ آرڈر کے بلے بازوں رتوراج گائیکواڈ (40)، فاف ڈو پلیسی (43) اور معین علی (32) اور آخر میں رویندرا جڈیجہ کی جارحانہ اننگز کی بدولت 20 اوورز میں آٹھ وکٹوں پر 172 رن بناکر دلچسپ مقابلے میں دو وکٹ سے جیت حاصل کرلی۔

گائیکواڈ نے دو چوکوں اور تین چھکوں کی مدد سے 28 گیندوں پر 40، ڈو پلیسیس نے 30 گیندوں پر سات چوکوں کی مدد سے 43 اور جڈیجہ نے دو چوکوں اور دو چھکوں کی مدد سے آٹھ گیندوں پر زبردست 22 رنز بنائے۔ جڈیجہ کو پلیئر آف دی میچ کے اعزاز سے بھی نوازا گیا۔

کے کے آر کی جانب سے سنیل نارائن نے چار اوور میں 41 رن دے کر تین وکٹیں حاصل کیں جبکہ پرسدھ کرشنا، لاکی فرگیوسن، ورون چکروتی اور آندرے رسل نے ایک ایک وکٹ حاصل کیا۔

اس سے قبل کے کے آر کی طرف سے راہل ترپاٹھی (45)، نتیش رانا ناٹ آؤٹ 37 اور دنیش کارتک نے 26 رن کی بہترین اننگز کھیلی تھی۔

چنئی کی آئی پی ایل کے دوسرے مرحلے میں یہ مسلسل تیسری جیت ہے اور اس جیت کے ساتھ ملے دو پوائنٹ کی بدولت چنئی کی ٹیم ٹیبل میں پھر سے چوٹی پر پہنچ گئی ہے۔