مشکل وقت میں کھیلنا فواد عالم سے سیکھنا چاہیے: بابر اعظم

پاکستان کرکٹ ٹیم کے کپتان بابر اعظم نے کہا کہ فواد عالم شاندار فارم میں ہیں اور وہ مشکل وقت میں جس طرح کھیلتے ہیں ان سے سیکھنا چاہیے۔

ویسٹ انڈیز کے خلاف دوسرے ٹیسٹ میچ کے پہلے دن کپتان بابر اعظم نے فواد عالم کی تعریف کرتے ہوئے کہا کہ وہ زبردست فارم میں ہیں اور بہترین کھیل کا مظاہرہ کررہے ہیں۔

انہوں نے کہا کہ دن کے آغاز میں گیندبازوں کو پچ سے مدد مل رہی تھی۔ ابتدائی تین وکٹیں جلد گرنے کے بعد فواد عالم نے بھرپور ساتھ دیا۔

انہوں نے کہا کہ فواد عالم سے کہا تھا کہ ٹیم کو مشکل سے نکالنے کے لیے لمبی پارٹنرشپ کی ضرورت ہوگی۔ دونوں نے طے کیا تھا کہ رنز بنانے کے لیے زیادہ دیر کریز پر رکنا ضروری ہے۔

بابر اعظم نے کہا کہ مشکل وقت میں جس طرح فواد عالم کھیلتے ہیں، ہمیں ان سے سیکھنا چاہیے، فواد عالم کو بیٹنگ کے دوران کریمپس پڑگئے تھے جس کے بعد وہ ریٹائرڈ ہرٹ ہوکر پویلین چلے گئے تھے۔

کپتان نے بتایا کہ پہلی اننگز میں 300 سے 350 رنز بنانا ہمارا ہدف ہے، محمد رضوان اور فہیم اشرف کریز پر موجود ہیں۔

بابر اعظم نے کہا کہ طویل فارمیٹ کی کرکٹ میں انفرادی کارکردگی بہتر بنانے کے لیے محنت کررہا ہوں، خوشی ہے کہ محنت کا پھل مل رہا ہے۔