رنگنا ہیرات اور ایشویل پرنس بنگلہ دیش ٹیم سے وابستہ

سری لنکا کے کامیاب لیفٹ آرم اسپنر رنگنا ہیرات بنگلہ دیش کے اسپن گیند بازی مشیر اور جنوبی افریقہ کے سابق بلے باز ایشویل پرنس بلے بازی مشیر بنیں گے۔ بنگلہ دیش کرکٹ بورڈ نے اس بات کی تصدیق کی ہے۔

بنگلہ دیش بورڈ کے کرکٹ آپریشنز کے صدر اکرم خان نے کہا 'اس وقت کووڈ کے سبب کوچ تلاش کرنا بہت مشکل ہے اس لیے ہم نے قلیل مدتی بنیاد پر انہیں منتخب کیا ہے اور اگر ان کا کام اطمینان بخش پایا جاتا ہے تو ہم انہیں جاری رکھیں گے۔

اکرم خان نے کہا کہ 'رنگنا ہیرات اسپن کوچ ڈینیل ویٹوری کی جگہ لینے کے لیے سب سے مضبوط دعویدار تھے۔ سری لنکا کے لیجنڈ اسپنر عبوری اسپن کوچ صالح اسلام سے اس عہدے کا چارج لیں گے جبکہ پرنس کو جان لوئس کی جگہ یہ عہدہ دیا گیا ہے۔

ہیرات بنگلہ دیشی کوچنگ ٹیم سے زمبابوے دورے پر ہی وابستہ ہوجائیں گے اور اس رول میں وہ رواں ہونے والے ٹی 20 عالمی کپ تک رہیں گے جبکہ ایشویل پرنس کے معاہدے کے مطابق وہ زمبابوے کے آئندہ دورے میں بنگلہ دیشی بلے بازوں کے ساتھ کام کریں گے۔

رنگنا ہیرات ٹیسٹ کرکٹ کی تاریخ میں سب سے کامیاب لیفٹ آرم اسپنر ہیں اور دو دہائیوں تک چلے اپنے شاندار کیریر میں انہوں نے 433 وکٹ حاصل کئے ہیں۔ انہیں آئی سی سی، ایس ایل سی لیول 3 کوچ کی ڈگری حاصل ہے اور ان کی خصوصیت اسپن گیند بازی میں ہے۔

اس کے علاوہ ایشویل پرنس نے تینوں فارمیٹ میں جنوبی افریقہ کی کل 119 بار نمائندگی کی ہے۔ 44 سالہ پرنس لیول 3 کوچ ہیں اور وہ جنوبی افریقہ اے کے لیے بلے بازی مشیر رہ چکے ہیں اور وہ اے ٹیم کے عبوری چیف کوچ بھی رہ چکے ہیں۔