اظہر الدین نے کہا کہ میں قانونی طور پر ایسوسی ایشن کا صدر بنا ہوں اس لیے اگر کسی کو مجھ سے کوئی پرابلم ہے تو وہ کورٹ سے رجوع ہوسکتا ہے نہ کہ مجھے عہدے سے برخاست کر کے وجہ بتاؤ نوٹس دے۔
حیدرآباد کرکٹ ایسوسی ایشن کے صدر محمد اظہر الدین نے پریس کانفرنس میں کہا کہ ایپکس کونسل کے ممبروں کو حق نہیں ہے کہ وہ انہیں وجہ سے نوٹس دیں۔
اظہر الدین نے کہا کہ 'ایپکس کونسل کسی کو بھی عہدے سے بے دخل کرنے کا اختیار نہیں رکھتی۔ کونسل کو ہائی کورٹ کے احکامات کی بھی پرواہ نہیں ہے۔
واضح رہے کہ 'ایپکس کونسل نے اظہرالدین کو ایچ سی اے کے صدر کے عہدے سے ہٹا کر انہیں شوکاز نوٹس جاری کیے ہیں۔
اپیکس کونسل نے کہا کہ 'اظہرالدین کے خلاف اراکین کی شکایات پر غور کرنے کے بعد رواں ماہ اپیکس کونسل کے اجلاس میں وجہ بتاو نوٹس جاری کرنے کا فیصلہ کیا گیا تھا کہ آپ (اظہر) نے قواعد کے برخلاف کام کیا ہے۔ ان شکایات کی مکمل سماعت تک اور حتمی فیصلہ آنے تک آپ کو معطل رکھا جائے گا، نیز ایچ سی اے میں بھی ان کی رکنیت منسوخ کی جارہی ہے۔