Asian Games 2023 بھارتی بیڈمنٹن خواتین ٹیم منگولیا کو شکست دے کر کوارٹر فائنل میں پہنچی

بھارت کی بیڈمنٹن خواتین ٹیم جمعرات کو منگولیا کو 3-0 سے شکست دے کر کوارٹر فائنل میں داخل ہو گئی ہے۔ چین میں جاری 19ویں ایشیائی کھیلوں میں آج دو بار کی اولمپک تمغہ جیتنے والی پی وی سندھو، اشمیتا چلیہا اور انوپما اپادھیائے کی ہندوستانی خواتین کی ٹیم نے راؤنڈ آف 16 کے میچوں میں 3-0 سے کامیابی حاصل کی۔

ہانگزو: ایشیائی کھیلوں 2023 میں بھارت کے کھلاڑیوں کی شاندار کارکردگی کا سلسلہ جاری ہے۔ بی جے جمنازیم کے کورٹ پر کھیلتے ہوئے پی وی سندھو نے منگولیا کی مائیگمارٹسرین گنباٹر کے خلاف میچ کا آغاز کیا اور اپنی منگولیا کی حریف کو آسانی سے 21-2، 21-3 سے شکست دے کر ہندوستان کو 1-0 کی برتری دلائی۔ ٹیم کے دوسرے میچ میں بیڈمنٹن کی دنیا میں 49ویں نمبر کی نوجوان ہندوستانی کھلاڑی اشمیتا چلیہا نے کھرلین درخانبتار کے خلاف 21 منٹ میں 21-2، 21-3 کے اسکور سے کامیابی حاصل کی۔تیسرے اور آخری سنگلز میچ میں دنیا کی 85 نمبر کی ہندوستانی بیڈمنٹن کھلاڑی انوپما اپادھیائے نے منگولیا کی کھلاڑی کھلانگو باتار کو 22 منٹ تک جاری رہنے والے میچ میں سیدھے گیمز میں 21-0، 21-2 سے ہرا کر ہندوستانی ٹیم کو 3-0 سے فتح دلائی۔

ہندوستانی خواتین ٹیم جمعہ کو کوارٹر فائنل میں تھائی لینڈ کا مقابلہ کرے گی۔دریں اثنا، ہندوستانی مرد ٹیم پہلے راؤنڈ میں بائی ملنے کے بعد جمعہ کو ایکشن میں نظر آئے گی۔ ایچ ایس پرنے کی قیادت والی ٹیم کوارٹر فائنل میں نیپال یا منگولیا سے ٹکرائے گی۔ سیمی فائنل میں جگہ بنانے سے ہندوستانی بیڈمنٹن ٹیم کے لیے ایک تمغہ یقینی ہو جائے گا۔

یو این آئی