ایشیا کپ 2022 کے شیڈول کے مطابق گروپ اے میں بھارت، پاکستان اور ایک کوالیفائر ٹیم کو رکھا گیا ہے جبکہ گروپ بی میں میزبان سری لنکا، افغانستان اور بنگلہ دیش ہیں۔ تمام میچز مقامی وقت کے مطابق شام 6 بجے شروع ہوں گے۔ دبئی اس ٹورنامنٹ کے 10 میچوں کی میزبانی کرے گا جبکہ شارجہ تین میچوں کا میزبان ہوگا۔
تمام ٹیمیں راؤنڈ رابن کی بنیاد پر اپنے گروپ میں ایک ایک میچ کھیلیں گی۔ ہر گروپ سے سرفہرست دو ٹیمیں سُپر 4 راؤنڈ کے لیے کوالیفائی کریں گی، سیمی فائنل کے لیے سُپر 4 میں تمام ٹیمیں ایک بار پھر آمنے سامنے ہوں گی اور پھر سُپر 4 میں ٹاپ دو ٹیمیں فائنل کے لیے کوالیفائی کریں گی جو 11 ستمبر کو دوبئی میں کھیلا جائے گا۔
اس ٹورنامنٹ کے شیڈول پر نظر ڈالیں تو واضح ہوتا ہے کہ بھارت اور پاکستان دونوں ٹیمیں مجموعی طور پر تین بار آمنے سامنے ہو سکتی ہیں۔ گروپ میچوں کے بعد سُپر 4 اور پھر فائنل میں بھی ان دونوں روایتی حریفوں کے آمنے سامنے ہونے کا قوی امکان ہے۔