جاوڈیکر نے لتا منگیشکر کوسالگرہ کی مبارک باددی

مرکزی اطلاعات و نشریات کے وزیر پرکاش جاوڈیکر نے سنیچر کے روز بھارت رتن لتا منگیشکر کو ان کی سالگرہ کے موقع پر مبارک باد دی۔

جاوڈیکر نے ٹویٹ کرکے کہا’’ بھارت کی سنہری آواز، گائیکی کی شہزادی اور ہم سب کی عزیز بھارت رتن لتا منگیشکر جی کو سالگرہ کی دلی مبارکباد۔ لتا دیدی کی میٹھی اور دل کو سکون پہنچانے والی آواز نے ہم سبھی کو اس دباؤ کی زندگی میں خوشی کے لمحات دیئے ہیں۔ ایشور سے آپ کی صحت اور درازی عمر کیلئے دعاگو ہوں‘‘۔

قابل ذکر ہے کہ لتا منگیشکر سنیچرکے روز 90 برس کی ہو گئیں۔ اپنی شاندار آواز سے کروڑوں لوگوں کے دلوں پر راج کرنے والی لتا منگیشکر کی پیدائش 28 ستمبر 1929 میں مدھیہ پردیش کے اندور میں ایک مراٹھی برہمن خاندان میں ہوئی تھی۔
لتا منگیشکر بھارت رتن، پدم وبھوشن، پدم بھوشن، دادا صاحب پھالکے، راجیو گاندھی خیر سگالی ایوارڈ سمیت کئی خطابات سے نوازی جاچکی ہیں۔