سونو سود 25 ہزار یومیہ مزدوروں کو کھانا کھلائیں گے

ممبئی میں ضرورت مندوں کو کھانا تقسیم کرنے کے بعد اب سونو سود نے رمضان کے مقدس ماہ میں بہار، کرناٹک، اترپردیش اور مغربی بنگال سے آنے والے یومیہ مزدوروں کو کھانا کھلانے کا انتظام کیا ہے۔

بالی ووڈ اداکار سونو سود پہلے ہی کورونا وائرس کی اس لڑائی میں بہت لوگوں کی مدد کر چکے ہیں اور اب انہوں نے رمضان کے مقدس ماہ میں 25،000 یومیہ مزدوروں کو کھانا کھلانے کا وعدہ کیا ہے۔

جب اداکار کو پتہ چلا کہ ریاست مہاراشٹر کے بھیونڈی میں کرناٹک، اترپردیش، بہار اور مغربی بنگال جیسی ریاستوں سے آنے والے یومیہ مزدور پریشان ہیں، جس کے بعد انہوں نے رمضان سے قبل روزے دار لوگوں کے لئے کھانا تیار کرنے اور اسے تقسیم کرنے کا انتظام کیا ہے۔

میڈیا رپورٹ کے مطابق اداکار کا کہنا تھا کہ رمضان المبارک کے پاک ماہ میں یومیہ مزدرورں کی تمام ضروریات کا خیال رکھا جائے گا۔ اس مشکل وقت میں 'ہم میں سے ہر ایک کو ایک دوسرے کے ساتھ کھڑا ہونا پڑے گا، تاکہ سارا دن گزرنے کے بعد کوئی بھوکا نہ رہے'۔

واضح رہے کہ سونو سود نے ممبئی کے جوہو میں واقع اپنے ہوٹل کے دروازے پہلے ہی تمام ہیلتھ ورکرز کے لئے کھول رکھے ہیں، تاکہ کورونا کی روک تھام میں کچھ مدد مل سکے۔