شبانہ اعظمی کی احتجاج کرنے والوں کے ساتھ اظہار یکجہتی

بالی وڈ اداکارہ شبانہ اعظمی نے شہریت ترمیمی قانون اور نیشنل رجسٹر آف سٹیزن شپ (این آر سی) کی مخالفت میں جاری احتجاج کی حمایت کی ہے۔

اس سلسلے میں انہوں نے ٹویٹر پر ایک ویڈیو شیئر کیا ہے جو تیزی سے وائرل ہو رہا ہے۔

اس ویڈیو کے ذریعے انہوں نے حکومت سے درخواست کی ہے کہ وہ ان کی آواز کو اطمینان سے سنیں۔

انہوں نے کہا کہ 'اس وقت میں ہندوستان میں نہیں ہوں لیکن سی اے اے اور این آر سی کے خلاف جو احتجاج ہو رہے ہیں، ان کی میں حمایت کرتی ہوں۔ میں اس احتجاج میں شامل نہیں ہو سکی جس کا مجھے افسوس ہے۔

شبانہ اعظمی نے ٹویٹ کر کے کہا کہ 'میں تمہارے ساتھ ہوں اور کسی بھی تشدد کے بغیر احتجاج جاری رکھنے کی اپیل کرتی ہوں۔'

شبانہ اعظمی نے اپنے والد کیفی اعظمی کے چند اشعار کو بھی شیئر کیا ہے۔

آج کی رات بہت گرم ہوا چلتی ہے
آج کی رات نہ فٹ پاتھ پہ نیند آئے گی
سب اٹھو، میں بھی اٹھوں، تم بھی اٹھو، تم اٹھو
کوئی کھڑکی اسی دیوار میں کھل جائے گی