پاکستانی اداکارہ ماہرہ خان کورونا سے متاثر

پاکستانی اداکارہ ماہرہ خان کووڈ 19 سے متاثر پائی گئی ہیں۔ ماہرہ خان بالی ووڈ کے کنگ خان شاہ رخ خان کے ساتھ فلم 'رئیس' میں نظر آئی تھیں۔

پاکستانی اداکارہ ماہرہ خان نے اتوار کے روز اس بات کی تصدیق کی کہ وہ کووڈ 19 سے متاثر ہیں اور وہ فی الحال ہوم قرنطینہ اختیار کی ہوئی ہیں۔

ہم سفر، صدقے تمہارے جیسے شوز اور بول، بن روئے فلم سے شہرت حاصل کرنے والی 35 سالہ اداکارہ نے کہا کہ کورونا سے متاثر ہونا مشکل ہے لیکن امید ہے کہ وہ جلد شفایاب ہوجائیں گی۔

ماہرہ خان نے لکھا کہ 'میں کووڈ 19 سے متاثر ہوں۔ فی الحال میں نے قرنطینہ اختیار کیا ہوا ہے اور میں نے ان تمام لوگوں کو بھی اطلاع دے دی ہے جو گزشتہ دنوں میرے رابطے میں آئے تھے۔ یہ مشکل ہے لیکن میں جلد شفایاب ہوجاؤں گی۔

انہوں نے لوگوں سے ماسک پہننے اور دیگر تمام احتیاطی تدابیر پر عمل کرنے کی گزارش کی ہے۔