کشل پنجابی کی خودکشی پر سوالیہ نشان؟

ممبئی میں بالی وڈ اداکار کشل پنجابی نے اپنے گھر میں خودکشی کر لی ہے، اس بات کی معلومات جیسے ہی ممبئی پولیس کو ہوئی اُنہوں نے خودکشی کا معاملہ درج کر کے لاش کو پوسٹ مارٹم کے لیے روانہ کر دیا۔

بالی وڈ کے 37 سالہ اداکار کشل پنجابی نے اپنی باندرہ کی رہائش گاہ پر خودکشی کر لی ہے، انہوں نے خودکشی نوٹ میں اپنی موت کا ذمہ دار کسی کو بھی نہیں بتایا جبکہ نوٹ میں کشل نے اپنی جائیداد کو دو حصوں میں تقسیم کرنے کی بات لکھی ہے۔

ابتدائی جانچ میں معلوم ہوا ہے کہ کشل ذہنی تناؤ کا شکار تھے اور اس سے تنگ آکر انہوں نے یہ انتہائی قدم اٹھایا حالاںکہ ابھی یہ بات واضح نہیں ہو سکی ہے کہ وہ کس وجہ سے ذہنی تناؤ میں مبتلا تھے اور پوسٹ مارٹم کے بعد ہی پولیس مزید تفتیش کرے گی۔

فی الحال ممبئی پولیس تفتیش کر رہی ہے کہ کشل کے گھر سے جو خودکشی نوٹ ملا ہے وہ انہوں نے ہی لکھا ہے یا کسی اور نے؟

واضح رہے کہ کشل پنجابی نے کئی بالی وڈ فلموں میں اپنی اداکاری کے جوہر دکھائے جس میں فلم کال اور لکشیہ ان کے لیے مقبولیت کی وجہ بنی فلم کال اور لکشیہ کی وجہ سے ترقی کے زینے طے کرنے والا اداکار کی حقیقی دنیا کی جنگ میں کیسے ہار گیا یہ سوال اب بھی برقرار ہے۔