اداکار ارجن کپور کے کورونا مثبت آنے کے تقریبا ایک ماہ بعد اداکار نے بدھ کے روز بیان جاری کرتے ہوئے اعلان کیا کہ اب انکی کورونا کی رپورٹ منفی آئی ہے۔
عشق زادے اداکار نے انسٹاگرام کے پوسٹ میں اپنی شفایابی کی تصدیق کی، انہوں نے اپنے پوسٹ میں لکھا کہ مجھے یہ بتاتے ہوئے خوشی محسوس ہورہی ہے کہ ہفتے کے آخر میں میری کورونا وائرس کی رپورٹ منفی آئی ہے۔
انہوں نے مزید لکھا کہ پورے طریقے سے شفایاب ہونے کے بعد میں بہتر محسوس کررہا ہوں اور دوبارہ کام پر لوٹنے کے لیے پرجوش ہوں۔آپ کی نیک خواہشات کا آپ سب کا شکریہ۔
انہوں نے لکھا کہ میں سب سے اپیل کرتا ہوں کہ آپ اس وائرس کو سنجیدگی سے لیں اور ماسک کو ضرور پہنیں۔لوگوں کو سمجھنا چاہیے کہ یہ کورونا وائرس ہم سب کی زندگی کو متاثر کر رہا ہے، جوان اور بزرگ دونوں کو۔اس لیے ہر وقت ماسک پہنیں۔مدد کرنے کے لیے بی ایم سی کا شکریہ اور صف اول میں کام کر رہے تمام لوگوں کو میرا سلام جو ہماری دیکھ بھال کرنے کے لیے اپنا سب کچھ خطرے میں ڈال رہے ہیں۔ہم سب ہمیشہ کے لیے آپ کے قرض دار ہیں۔
واضح رہے کہ 6 ستمبر کو ارجن کپور نے انسٹاگرام میں پوسٹ شیئر کرتے ہوئے اس بات کی تصدیق کی تھی وہ کورونا وائرس متاثر پائے گئے ہیں اور انہوں نے گھر میں ہی قرنطینہ اختیار کیا ہے۔