'پاتال لوک' کی ہدایت کار انوشکا شرما کو قانونی نوٹس

اداکارہ انوشکا شرما کی پروڈکشن کمپنی کلین سلیٹ فلمز کے بینر تلے بنی حالیہ ویب سیریز 'پاتال لوک' کو جتنی پذیرائی ملی ہے اتنی ہی اس کی مخالفت بھی ہوئی ہے، سریز میں استعمال ہونے والے متنازعہ ڈائیلاگ کے لیے اداکارہ کو قانونی نوٹس بھیجا گیا ہے۔

گلڈ کے رکن اور وکیل وکرن شری گرونگ نے انوشکا کو اس معاملے میں قانونی نوٹس بھجوایا ہے، وکیل کے مطابق سیریز کے دوسرے ایپیسوڈ میں ایک ایسا ڈائیلاگ ہے جو پوری نیپالی برادری کی توہین کرتا ہے۔

وکیل نے کہا 'ایک ویڈیو کلپ میں تفتیش کے دوران لیڈی پولیس آفیسر نیپالی کردار پر نسل پرستانہ زیادتی کرتی ہے، اگر صرف نیپالی لفظ استعمال ہوتا تو پھر اس میں کوئی حرج نہیں تھا لیکن اس کے بعد کا لفظ قبول نہیں ہے، چونکہ انوشکا اس سیریز کی پروڈیوسر ہیں اس لیے ہم نے انہیں نوٹس بھیجا ہے، تا ہم اداکارہ کی طرف سے کوئی ردعمل سامنے نہیں آیا ہے۔

یہ بھی اطلاعات ہیں کہ سیریز میں استعمال شدہ ڈائلاگ سے گورکھا برادری میں ناراضگی پائی جا رہی ہے، اس سلسلے میں ان کی جانب سے سیریز پر پابندی عائد کرنے کے لیے 18 مئی کو ایک آن لائن پٹیشن شروع کی گئی ہے۔

ویب سریز کے ریلیز کے دن سے ہی ٹویٹر پر ہندو کمیونٹی کے جذبات کو مجروح کرنے کے لیے 'پاتال لوک' پر پابندی عائد کرنے اور انوشکا شرما سے معافی مانگنے کا مطالبہ کیا جارہا ہے۔

ایمیزون پرائم پر 15مئی کو جاری کی جانے والی اس سریز میں جئے دیپ اہلاوت، نیرج کابی، ابھیشیک بنرجی اور گل پناگ اہم کردار میں ہیں۔