عالیہ بھٹ نے کورونا وارئیرس کو بھیجا انوکھا تحفہ

بالی وڈ اداکارہ عالیہ بھٹ نے کورونا وارئیرس کا حوصلہ افزائی کرنے کے لیے انہیں تحفہ بھیجا ہے۔ساتھ میں انہوں نے اس تحفے کے ساتھ ایک خاص پیغام بھی بھیجا ہے۔

عالمی وبا کووڈ 19 متاثرین کی زندگی بچانے کے لئے کورونا وارئیرس اپنی جان لگارہے ہیں۔ ان کے دن رات کام کرنے اور لوگوں کو اس بیماری سے بچانے کے جذبہ کو دیکھ کر عالیہ نے انوکھے انداز میں ان کا حوصلہ بڑھایا ہے۔ انہوں نے کورونا وارئیرس کو اپنی جانب سے ایک سرپرائز گفٹ بھیجا ہے ۔ اس گفٹ کے ساتھ ایک خاص پیغام بھی موجود ہے۔

ممبئی کے ایک اسپتال میں کام کرنے والے ایک ڈاکٹر نے عالیہ کے ’سرپرائز اور شکریہ نوٹ‘ کو سوشل میڈیا پر شیئر کیا ہے۔ ڈاکٹر شری پد گنگاپورکر نے اپنے ٹوئیٹر پر ایک تصویر شیئر کرتے ہوئے عالیہ کو اپنی جانب سے شکریہ کہا ہے۔

شری پد نے جو تصویر شیئر کی ہے اس میں گفٹ ہمپر میں چاکلیٹ بار، سوئٹ بن، ڈرنک کے ساتھ سنیکس دکھائی دے رہا ہے۔ اس کے ساتھ ایک پیپر پر ’شکریہ‘ بھی لکھا ہوا ہے۔ باکس میں چپکے نوٹ پر عالیہ نے پیغام بھیجا ہے کہ ’’شکریہ، آپ جو کچھ بھی کررہے ہیں لوگوں کو صحت یاب اور محفوظ رکھنے کے لئے۔ آپ اصلی ہیرو ہیں‘‘۔

ڈاکٹر شری پد نے عالیہ بھٹ کے اس حوصلہ افزا سرپرائز کے بدلے اپنی جانب سے بھی ایک پیغام دیتے ہوئے لکھا ہے کہ ’’شکریہ عالیہ بھٹ اس پیارے سے سرپرائز کے لئے۔ کورونا وائرس وباکے خطرناک وقت کے دوران آپ کا یہ تحفہ بہت خاص ہے‘‘۔