سچے بھائی کی حمایت میں آئے عدنان سمیع

بالی ووڈ گلوکار سونو نگم اس وقت دبئی میں اپنے کنبے کے ساتھ رہ رہے ہیں۔ وہ لاک ڈاؤن کی وجہ سے واپس نہیں آسکے۔ اذان کے حوالے سے انہیں سوشل میڈیا پر ٹرول کیا گیا۔ عدنان سمیع نے سونو کو اپنا 'سچا بھائی' قرار دیتے ہوئے لوگوں سے کہا کہ وہ انہیں تنہا چھوڑ دیں!

ایک ایسے وقت میں جب گلوکار سونو نگم 'اذان' پر اپنی تین سالہ پرانی ٹویٹ پر انٹرنیٹ صارفین کے ذریعہ ٹرول ہورہے ہیں۔ گلوکار عدنان سمیع ان کی حمایت میں سامنے آگئے ہیں۔ سونو نگم کو 'سچا بھائی' قرار دیتے ہوئے سمیع نے دعوی کیا کہ یہ گلوکار تمام مذاہب کا احترام کرتا ہے۔

سمیع نے ٹویٹ کیا 'جہاں تک سونو نگم کا تعلق ہے تو ان کی گائیکی کو بھول جائیں، جو حیرت انگیز طور پر خوبصورت ہے۔ وہ ایک سچا بھائی ہے جو ہمیشہ میرے ساتھ رہا ہے اور مجھے اپنی ہی طرح پیار کرتا ہے! میں ذاتی طور پر ایک چیز جانتا ہوں کہ وہ ہر مذہب اور ایمان کا احترام کرتا ہے! براہ کرم انھیں تنہا چھوڑ دو'۔

سونو نگم اس وقت اپنے اہل خانہ کے ساتھ دبئی میں ہیں اور لاک ڈاؤن کی وجہ سے وہ ہندوستان واپس نہیں جاسکے ہیں۔

سمیع کے علاوہ فلم پروڈیوسر وویک اگنیہوتری نے بھی سونو نگم کی حمایت میں ٹویٹ کیا۔ انہوں نے لکھا 'کسی کو سونو نگم پر تبصرہ کرنے کا حق تب ہونا چاہئے جس دن وہ ان کی طرح بہت سے دلوں کو چھوسکیں اور انہیں محظوظ کرا سکیں، جیسا سونو کی موسیقی نے کیا ہے'۔

سال 2017 میں سونو نگم نے سوشل میڈیا پر کچھ ٹویٹس کیے تھے، جس میں انہوں نے اذان کے بارے میں لکھا تھا کہ اس سے مجھے نیند میں خلل پڑ رہا ہے۔ اس ٹویٹ کے ساتھ ہی وہ ایک بار پھر ٹرولرس کے نشانے پر آگئے ہیں۔