انڈین اسپیس ریسرچ آرگنائزیشن (اسرو) کا مشن چندریان -3 نئی تاریخ رقم کرنے کے لیے اپنی منزل چاند کی جانب رواں دواں ہے۔ چندریان 3 کا لینڈر وکرم چاند کی سطح پر اترنے کے لیے پوری طرح تیار ہے اور یہ دو دن بعد 23 اگست کو محفوظ لینڈنگ کی کوشش کرے گا۔ چاند کی سطح پر لینڈنگ سے پہلے چندریان تھری کے لینڈر نے چاند کی تازہ اور حیرت انگیز تصاویر بھیجی ہیں۔ چندریان -3 نے لینڈنگ سے پہلے لینڈر ہیزرڈ ڈیٹیکشن اینڈ ایوائیڈنس کیمرے (LHDAC) کی مدد سے چاند کی قریب ترین اور نئی تصاویر بھیجی ہیں۔ یہ تصاویر چاند کی سطح کے جنوبی قطب پر اس جگہ کی ہیں، جہاں چندریان 3 کے لینڈر 'وکرم' کو اتارنے کی تیاری ہے۔
اسرو نے سوشل میڈیا پلیٹ فارم 'X' (سابقہ ٹویٹر) پر تصویریں شیئر کرتے ہوئے لکھا کہ ''یہ چاند کے دوردراز علاقے کی تصویریں ہیں، جنہیں لینڈر کے لینڈر ہیزرڈ ڈیٹیکشن اینڈ ایوائیڈنس کیمرے (LHDAC) نے لیا ہے۔' خصوصی کیمرے کے بارے میں وضاحت کرتے ہوئے، اسرو نے کہا کہ ''یہ کیمرہ لینڈر کے نیچے اترنے کے دوران محفوظ لینڈنگ ایریا کا پتہ لگانے میں مدد کرتا ہے۔ اسے اسپیس ایپلیکیشن سینٹر اسرو میں خاص طور پر محفوظ لینڈنگ ایریا کا پتہ لگانے کے لیے تیار کیا گیا ہے۔