Dengue Case in UP پریاگ راج میں ڈینگو کے مریض کو پلیٹلیٹس کی جگہ موسمی کا جوس چڑھانے کا الزام

پریاگ راج میں ڈینگو کے مریض کو پلیٹ لیٹس کی جگہ پر موسمی کا جوس چڑھانے کا معاملہ سامنے آیا ہے۔ متوفی کے رشتہ داروں کا الزام ہے کہ ایک پرائیویٹ اسپتال میں ان کے مریض کو پلیٹ لیٹس کی جگہ موسمی کا جوس چڑھا دیا گیا جس کی وجہ سے اس کی موت ہوگئی۔

پریاگ راج: اترپردیش میں ان دنوں ڈینگو کے معاملے میں تیزی سے اضافہ ہورہا ہے۔ اس دوران ڈینگو کے مریضوں کے علاج میں لاپرواہی کا معاملہ بھی سامنے آرہا ہے۔ ایسا ہی ایک معاملہ پریاگ راج سے سامنے آیا ہے۔ جہاں ڈینگو سے مرنے والے ایک مریض کے رشتہ داروں کا الزام ہے کہ ایک پرائیویٹ اسپتال میں ان کی مریض کو پلیٹ لیٹس کی جگہ موسمی کا جوس دے دیا گیا۔ متوفی کے اہل خانہ نے اس معاملے کی شکایت پولیس اور محکمہ صحت کے حکام سے کی۔ اس کے بعد سی ایم او نے اسپتال پر کارروائی کرتے ہوئے ہسپتال کو سیل کرنے اور مریض کو دئے گئے پلیٹ لیٹس کی جانچ کرنے کا حکم دیا ہے۔ فی الحال مذکورہ اسپتال کو سیل کر دیا گیا ہے۔

یہ واقعہ پریاگ راج کے دھومن گنج تھانہ علاقے میں واقع گلوبل اسپتال کی جپ جہاں ڈینگو کے ایک مریض کی علاج کے دوران موت ہوگئی۔ لواحقین کا الزام ہے کہ پرائیویٹ اسپتال میں پلیٹ لیٹس کے نام پر ان کے مریض کو موسمی کا جوس چڑھایا گیا۔ اس کے بعد مریض پردیپ پانڈے کی حالت بگڑ گئی، بعد ازاں متوفی کو دوسرے اسپتال لے جایا گیا جہاں علاج کے دوران اس کی موت ہوگئی۔ ڈینگو سے متاثرہ پردیپ کو 17 اکتوبر کو اسپتال میں داخل کرایا گیا تھا۔ اس کے بعد 19 اکتوبر کو انہیں غلط پلیٹ لیٹس دیے گئے۔ جب کہ اسپتال انتظامیہ کا کہنا ہے کہ مریض کے لواحقین خود ہی پلیٹلیٹس لائے تھے۔

وہیں اس معاملے پر آئی جی پریاگ راج راکیش سنگھ کا کہنا ہے کہ جعلی پلیٹلیٹس کی سپلائی کی جانچ کی جا رہی ہے۔ کچھ مشتبہ افراد کو حراست میں لیا گیا ہے۔ مریض کو پیش کیے جانے والے موسمی پھل کا جوس ہے یا کچھ اور، اس بارے میں ابھی کچھ بھی نہیں کہا جا سکتا ہے۔ وہیں ڈپٹی سی ایم برجیش پاٹھک نے اس معاملے میں سخت کارروائی کرنے کی بات کہی ہے۔ انہوں نے کہا کہ سی ایم او کو جائے وقوع پر بھیجا گیا ہے۔

پلیٹ لیٹس کے پیکٹ پر SRN ہسپتال کا اسٹیکر لگا ہوا ہے۔ ابتدائی تحقیقات میں پتہ چلا ہے کہ پلیٹ لیٹس کا پیکٹ ایس آر این اسپتال کا نہیں ہے جس کی وجہ سے یہ خدشہ بڑھتا جا رہا ہے کہ کہیں جعلی خون کے کاروبار میں ملوث گروہ کا ہاتھ تو نہیں ہے۔ اس پورے معاملے کے سامنے آنے کے بعد سی ایم او ڈاکٹر نانک سرن نے تحقیقات کا حکم دیا ہے۔ اس کے لیے تین رکنی کمیٹی بنائی گئی ہے، جو پورے معاملے کی تحقیقات کرے گی۔ اس کے بعد ہی پتہ چلے گا کہ پلیٹ لیٹس کے پیکٹ میں کیا تھا، جس کی وجہ سے مریض کی حالت بگڑ گئی اور اس کی موت واقع ہوئی۔ ہسپتال کی غفلت کو دیکھتے ہوئے نجی ہسپتال کا لائسنس معطل کر دیا گیا ہے۔ اس کے ساتھ ہی اسپتال کو سیل کرنے کے احکامات بھی دیے گئے ہیں۔