قتل معاملے میں دوسب انسپکٹرمعطل

اترپردیش کے ضلع سونبھدر کے کرما تھانہ علاقے میں سڑک پر اسپیڈ بریکر بنانے کو لے کر ہوئے تنازع میں ایک شخص کے قتل کے معاملے میں لاپرواہی برتنے کے الزام میں دو سب۔انسپکٹر کو فوری اثر سے معطل کردیا گیا ہے۔

سپرنٹنڈنٹ آف پولیسآشیش شریواستو نے بتایا کہ کرما تھانہ علاقے کے باریچک گاؤں میں اسپیڈ بریکر بنانے کے سلسلے میں ہوئے قتل کے معاملے میں لاپرواہی برتنے کے الزام میں تھانے کے سب۔انسپکٹر گنگادھرموریہ اور رام کرت رام کو فوری اثر سے معطل کردیا گیا ہے۔

انہوں نے بتایا کہ روڈ پر اسپیڈ بریکر بنانے کے سلسلے میں دو گروپوں میں مارپیٹ ہونے کے بعد ایک فریق کی جانب سے جانکی دیوی نے پولیس سے تحریری شکایت کی تھی۔

اس معاملے میں پولیس نے دوسرے فریق کے چار افراد کے خلاف مقدمہ درج کیا تھا۔ شام کو جانکی دیوی کے گروپ نے دوسرےفریق پرحملہ کردیا۔ جس میں اکھلیش اور راکیش شدیدطور سے زخمی ہوگئے۔ بعد میں علاج کے دوران اکھلیش کی موت ہوگئی۔