ڈی ڈی اے کے تین ملازم رشوت لیتے ہوئے گرفتار

سینٹرل بیورو آف انویسٹی گیشن (سی بی آئی) نے دہلی ڈیولپمنٹ اتھارٹی (ڈی ڈی اے) کے اسسٹنٹ ڈائریکٹر سمیت 3 ملازمین کو ایک لاکھ روپے رشوت لیتے ہوئے گرفتار کیا ہے۔

ہفتے کے روز سی بی آئی کے ایک عہدیدار نے بتایا کہ ڈی ڈی اے کے اسسٹنٹ ڈائریکٹر سدھانشو رنجن کو رشوت لینے کے الزام میں گرفتار کیا گیا۔ بعد میں ڈی ڈی اے میں کام کرنے والے ایڈیشنل ڈویژن کلرک (یو ڈی سی) اجیت بھاردواج اورسیکیورٹی گارڈ دروان سنگھ کو بھی گرفتار کرلیا گیا۔

انہوں نے بتایا کہ ایک شخص نے سی بی آئی میں شکایت درج کروائی ہے کہ جھگی کے بدلے ڈی ڈی اے سے ملے پلاٹ کی اینٹری کرانے کے بدلے اس سے چار لاکھ روپے رشوت طلب کی گئی تھی۔ شکایت کی بنیاد پر سی بی آئی نے جال بچھا کر اسسٹنٹ ڈائریکٹر کو گرفتار کیا اور بعد میں اس میں ملوث دو دیگر اہلکاروں کو بھی گرفتار کرلیا۔