امروہہ میں پچاس کروڑ مالیت کی صندل کی لکڑیاں ضبط

دہلی کرائم برانچ اور امروہہ پولیس نے ایک بڑی چھاپہ مار کارروائی کرتے ہوئے تقریباً 50 کروڑ روپے کی صندل کی لکڑی برآمد کی ہے۔ یہ خیال کیا جاتا ہے کہ یہ لکڑیاں بہت سے ممالک میں اسمگل کی جاتی ہیں۔

اترپردیش کے ضلع امروہہ کے ہاشمی نگر میں دہلی کرائم برانچ اور امروہہ کوتوالی پولیس نے مشترکہ کارروائی کرتے ہوئے بڑی مقدار میں سرخ صندل کی لکڑیاں برآمد کیں۔

اس پورے معاملے کے بارے میں معلومات دیتے ہوئے امروہہ کے پولیس سپرنٹنڈنٹ وپن ٹنڈا نے بتایا کہ 'ایک ملزم کی تلاش میں دہلی کرائم برانچ نے امروہہ پولیس کے ساتھ ایک جگہ پر چھاپہ مار کارروائی کی جہاں سفید اور سرخ صندل کی لکڑیوں کے ساتھ ساتھ کھیر کی لکڑیاں بھی بڑی مقدار میں برآمد ہوئیں۔'

اس معاملے میں پولیس، گودام کے مالک قمر احمد اور دو دیگر افراد کو حراست میں لے کر پوچھ گچھ کر رہی ہے۔

خیال کیا جاتا ہے کہ یہ لکڑیاں چین اور جاپان سمیت متعدد ممالک میں اسمگل کی جاتی ہیں۔ ان لکڑیوں کو تھرماکول اور بوری میں بھر کر ٹرک پر لوڈ کیا جارہا تھا۔

ایک اندازے کے مطابق ضبط کی گئی چندن کی ان لکڑیوں کی قیمت تقریباً 50 کروڑ بتائی جا رہی ہے۔ فی الحال پولیس یہ پتہ لگانے کی کوشش کر رہی ہے کہ ملزمین کا یہ نیٹ ورک کتنے ممالک تک پھیلا ہوا ہے۔