دہلی:بیوی بچوں کا مبینہ قاتل گرفتار

دارالحکومت دہلی کے نہال وہار علاقے میں گھر کے اندر ایک خاتون اور اس کے دو بچوں کو قتل کرنے کے معاملے میں شوہر کو پولیس نے گرفتار کر لیا ہے۔

گرفتار ملزم کی شناخت گگن کمار ساہو (39) کے طور پر ہوئی ہے۔
پولیس کے ایک افسر نے بدھ کے روز بتایا کہ خاندانی جھگڑے کی وجہ سے گگن نے اتوار کو بیوی اور دونوں بچوں کا قتل کر دیا تھا۔

واردات کے بعد سے ہی گگن موقع سے غائب تھا۔

پولیس نے اس کی گرفتاری کے لیے کئی ٹیمیں تشکیل دی ہیں۔ پولیس کو گذشتہ روز گگن کے بارے میں خفیہ اطلاع ملی جس کے بعد اسے پشچم وِہار سے گرفتار کیا گیا۔
انہوں نے کہا کہ شروعات میں گگن نے اپنی شناخت چھپانے کی کوشش کی لیکن پوچھ گچھ میں اس نے اپنا گناہ قبول کر لیا۔

پولیس نے بتایا کہ گگن بنیادی طور پر ضلع مونگیر کے جمال پور کا باشندہ ہے اور 12 سال کی عمر سے ہی یہاں رہ رہا ہے۔

وہ راج مستری کا کام کرتا تھا۔

شادی کے تین چار سال کے بعد سے ہی بیوی کے ساتھ جھگڑا شروع ہو گیا۔

وہ شک کرتا تھا کہ بیوی کے کسی اور شخص سے تعلقات ہیں۔

اسی سبب اکثر ان کے مابین جھگڑا ہوتا تھا۔

واردات والی رات کو جھگڑا اتنا بڑھ گیا کہ اس نے بیوی کے سر پر کسی بھاری چیز سے حملہ کر دیا جس سے اس کی موت ہو گئی۔

اس درمیان بچے کی آنکھ کھل گئی اور وہ رونے لگے اسی وقت گگن نے بچوں کے اوپر بھی حملہ کر کے دونوں کا قتل کر دیا۔

قتل کرنے کے بعد وہ موقع سے فرار ہو گیا تھا۔

غور طلب ہے کہ اتوار کو نہال وہار میں ہوئے قتل کے بارے پولیس کو اطلاع ملی تھی۔ اس میں 28 سال کی ایک خاتون پریتی، اس کے نو سال کے بیٹے اور پانچ سال کی بیٹی کا قتل کیا گیا تھا۔