گلبرگہ میں قتل کی واردات میں اضافہ

ریاست کرناٹک کے شہر گلبرگہ میں آئے دن قتل کی وارداتیں پیش آرہی ہیں جس سے پورے شہر میں خوف و ہراس کا ماحول پیدا ہوچکا ہے۔

سنیچر کی رات میں گلبرگہ شہر کے ایم۔جی روڈ پر ایک قتل کی واردات انجام دی گئی۔ یہاں فوڈ زون سے نزدیک ایک زیر تعمیر عمارت میں نا معلوم افراد نے ایک نوجوان کا قتل کردیا اور اس کی لاش کو گھسیٹ کر عمارت سے نیچے پھینک کر فرار ہوگئے۔

مقتول کی شناخت غلام دستگیر امجد علی تھا اور اس کی عمر محض 19 برس تھی، یہ گلبرگہ شہر کے نیا محلہ کا رہنے والا تھا اور ڈی فارمیسی کا طالب علم تھا۔

سنیچر کی شام وہ اپنے دوستوں سے ملاقات کرنے کے لیے اپنے گھر سے نکلا اور رات تک گھر واپس نہیں آیا۔ اگلی صبح پولیس نے اس کے گھر والوں کو قتل کی اطلاع دی۔

اس معاملے میں پولیس نے کیس درج کرلیا ہے لیکن قتل کی وجہ اب تک معلوم نہ ہوسکی ہے، فی الحال پولیس قاتلوں کا پتہ لگانے میں جٹی ہے۔