میرٹھ: طالبہ کا گولی مار کر قتل

اترپردیش کے شہر میرٹھ کے سردھنہ علاقے میں ایک طالبہ کو اسی کے گھر والوں نے گولی مار کر ہلاک کر دیا، ابتدائی تحقیقات میں معاملہ آنر کلنگ کا بتایا گیا ہے۔

میرٹھ پولیس نے بتایا کہ سردھنہ علاقہ کے دبتھووا ٹاؤن کے رہنے والے جيوندر کی 19 سالہ بیٹی ٹینا عرف تانیہ نے سنیچر کی شب تقریباً ساڑھے 11 بجے جب گھر کا دروازہ کھولا تو کسی نامعلوم شخص نے اسے گولی مار دی۔

زخمی حالت میں ٹینا کو ہسپتال لے جایا گیا، جہاں اس کی موت ہوگئی۔

انہوں نے بتایا کہ ٹینا 12 ویں جماعت کی طالبہ تھی اور گزشتہ برس فیل ہوگئی تھی۔

پولیس کے مطابق لڑکی کے اہل خانہ نے اس واقعہ کی اطلاع پولیس کو 12 بجے کے بعد دی۔

ذرائع نے بتایا کہ لڑکی کا قتل معاشقہ کے سبب اس کے ہی گھر والوں نے کیا ہے، اس بات کی تصدیق حراست میں لیے گئے مقتول لڑکی کے گھر والوں نے کی ہے۔

اس معاملے میں پولیس مزید تحقیقات کر رہی ہے۔