ویشالی: ہوٹل سے شراب برآمد، سات گرفتار

ریاست بہار کے ضلع ویشالی میں واقع سرائے تھانہ علاقہ کے سرائے بازار میں ایکسائز محکمہ کی ٹیم نے ایک لائن ہوٹل میں چھاپے ماری کر کے کثیر مقدار میں انگریزی شراب کے ساتھ اسمگلر سمیت سات لوگوں کو گرفتار کر لیا ہے۔

ایکسائز محکمہ کے ذرائع نے آج یہاں بتایا کہ اطلاع ملی تھی کہ سرائے بازار کے ایک لائن ہوٹل میں شراب کی فروخت کی جا رہی ہے۔ اس اطلاع کی بنیاد پر کل دیر رات کی گئی چھاپے ماری میں محکمہ کی ٹیم نے 117 بوتل انگریزی شراب، سات کین بیئر اور 11400 روپے نقد برآمد کئے ہیں۔

ذرائع نے بتایاکہ چھاپے ماری کے دوران لائن ہوٹل کے مالک اور شراب اسمگلر راجا کمار کے ساتھ چھ دیگرکو گرفتار کرلیا گیا ہے۔ گرفتار لوگوںمیں رام کشور تیواری، سنجیت تیواری، ستیش تیواری، سورج کمار، لکھیندر پاسوان اور انوج کمار شامل ہیں۔ گرفتار اسمگلر اور شرابیوں کو سرائے تھانہ کو سونپ دیا گیا ہے۔ ان لوگوں کو آج جیل بھیج دیا جائے گا۔