بہار کے ضلع ارریہ میں جمعہ کی دیر رات یہ واقعہ پیش آیا مقامی لوگوں نے اس کی اطلاع صدر ایس ڈی پی او پشکر کمار کو دی جس کے بعد پولیس جائے واقعہ پر پہنچی اور گاؤں والوں کی مدد سے دونوں زخمی بھائیوں کو علاج کے لیے صدر اسپتال داخل کیا گیا۔
ڈاکٹروں نے ایک بھائی کی نازک حالت کو دیکھتے ہوئے اسے پورنیہ ریفر کیا گیا مگر اس نے راستے میں ہی دم توڑدیا جبکہ ایک بھائی صدر اسپتال میں زیر علاج ہے۔ پولس نے جائے واردات سے ملزم بھائی محمد شمشاد کو گرفتار کر لیا ہے۔
اطلاع کے مطابق ارریہ کے سیسونا میں رہائش پذیر شمشاد کا زمین کو لے کر مجھوا گاؤں کے باشندے اور سگے بھائی مرتضیٰ، منہاج اور نجیب الرحمن کے مابین کافی عرصہ سے تنازع چل رہا تھا۔
اس تنازع کو حل کرنے کے لیے بیر گاچھی چوک پر پنچایت بلائی گئی، اسی دوران تنازع مزید بڑھ گیا اور بھائیوں کے مابین جھگڑا شروع ہو گیا، تب ہی چار بھائیوں میں سب سے بڑے شمشاد نے اپنے چھوٹے بھائی مرتضیٰ پر چاقو سے حملہ کر دیا اس دوران جب منہاج اپنے بھائی کو چھڑانے گیا تو شمشاد نے منہاج پر بھی تیز دھار چاقو سے حملہ کردیا۔
پورنیہ جانے کے دوران ہی مہناج کی موت واقع ہوگئی جبکہ مرتضی کی حالت نازک بتائی جارہی ہے۔ لاش کو پوسٹ مارٹم کے لیے ارریہ صدر اسپتال بھیج دیا گیا ہے۔
اس تعلق سے ایس ڈی پی او پشکر کمار نے بتایا کہ پولس کی مستعدی سے ملزم کو گرفتار کیا جاچکا ہے لیکن افسوس اس بات کا ہے کہ زخمی منہاج کی موت ہوگئی، انہوں نے یقین دہانی کرائی کہ پولس مقتول کے اہل خانہ کو انصاف دلائے گی۔
