پانی کے ٹینکر میں زہریلی شراب سپلائی کرنے والا گروہ گرفتار

میرٹھ پولیس نے ایک ایسے گروہ کا پردہ فاش کیا ہے جو پنجاب سے پانی کے ٹینکر میں شراب بھر کر اتر پردیش اور ہریانہ میں سپلائی کیا کرتا تھا۔

اتر پردیش میں زہریلی شراب پینے سے ہونے والی اموات میں اضافہ دیکھا جارہا ہے اور پولیس بھی ان معاملات پر قابو پانے کے لیے ہر ممکن کوشش کرتی نظر آرہی ہے۔

میرٹھ پولیس نے ایک ایسے گروہ کا پردہ فاش کیا ہے جو پانی ٹینکر میں نقلی شراب بھر کر دیگر ریاستوں میں سپلائی کیا کرتے تھے۔

ملک گیر پیمانے پر نقلی شراب کی سپلائی کرنے والے اس گروہ کے پانچ افراد کی گرفتاری کے ساتھ ساتھ دو کاریں اور ایک ٹینکر کو بھی پولیس نے قبضہ میں لےکر گروہ کے بقیہ ساتھیوں کی تلاش شروع کردی ہے۔

پولیس نے امکان ظاہر کیا ہے کہ مغربی اتر پردیش اور اترا کھنڈ میں زہریلی شراب کے سبب جو اموات ہوئی ہیں اس کے پس پشت بھی یہ گروپ ملوث ہو سکتا ہے۔

میرٹھ کے جانی تھانہ اور کنکر کھیڑا تھانہ پولیس کی مشترکہ کوششوں سے نقلی شراب سپلائی کرنے والے اس گروہ کا پردہ فاش ہوا ہے۔