سہارنپور: منشیات فروشی کے الزام میں ایک شخص گرفتار

اترپردیش کے ضلع سہارنپورمیں نشیلی اشیاء کی تسکری کرنے والے ایک ملزم کو گرفتار کیا گیا ہے۔ اس کے قبضے سے افیم، اسمیک اور ہیروئن برآمد کی ہے جس کی مالیت تقریباً 10لاکھ روپے بتائی جا رہی ہے۔

سہارنپور تھانہ منڈی پولیس نے نشیلی اشیاء کی تسکری کرنے کے الزام میں ایک ملزم کو گرفتار کیا ہے اور اس کے قبضے سے تقریباً 10 لاکھ روپے کی مالیت کی افیم، اسمیک اور ہیروئن برآمد کی ہے۔

موصولہ اطلاع کے مطابق سہارنپور ضلع میں ایس ایس پی سہارنپور کی ہدایت پر نشیلی اشیاء کی تسکری کرنے والوں کے خلاف گرفتاری کی مہم چلائی جارہی ہے۔ اسی کے تحت آج تھانہ منڈی پولیس کے ذریعہ چلکانہ روڈ پر چیکنگ کے دوران ایک ملزم منوج کمار کو گرفتار کرنے میں کامیابی حاصل کی ہے جو راجستھان کے ضلع کوٹہ کا رہنے والا ہے۔

پولیس نے اس کے پاس سے 4 کلو افیم، 100 گرام اسمیک، 20 گرام ہیروئن برآمد کی ہے۔ گرفتار ملزم کے پاس سے برآمد ہوئی نشیلی اشیاء کی قیمت بین الاقوامی بازار میں تقریباً 10لاکھ روپے بتائی جارہی ہے۔ تھانہ منڈی پولیس نے ملزم کے خلاف مختلف دفعات میں مقدمہ درج کر کے اسے جیل بھیج دیا ہے۔ پولیس نے جب ملزم سے پوچھ گچھ کی تو اس نے بتایا کہ وہ نشیلی اشیاء راجستھان کے جودھپور سے لے کر ہماچل پردیش میں فروخت کرتا تھا۔ واضح رہے کہ گرفتار ملزم سنہ 2006 میں کوٹہ کے تھانہ بھوانی منڈی میں این ڈی پی ایس ایکٹ کے تحت جیل بھی جاچکا ہے۔

سہارنپور کے ایس پی ونت بھٹناگر نے کہا کہ ریاست میں منشیات کے اسمگلروں کو پکڑنے کے حوالے سے جاری مہم کے تحت ایک اور ملزم کو گرفتار کیا گیا ہے۔ اس کے پاس سے کثیر مقدار میں منشیات برآمد کی گئی ہیں۔ جانچ کے بعد معلوم ہوا کہ یہ منیشات افیم، اسمیک اور ہیروئن ہیں۔ وہیں، اس کی مجرمانہ ریکارڈ کے بارے میں جب تفتیش کی گئی تو معلوم ہوا کہ ملزم اس سے قبل این ڈی پی سی ایکٹ کے تحت جیل بھی جاچکا ہے اور 10 سال کی سزا کاٹ کر واپس آیا ہے۔

انہوں نے مزید کہا کہ کثیر مقدار میں ملے منشیات سے لگتا ہے کہ ملزم سہارنپور میں منشیات کی سپلائی کرنے کے لیے آیا تھا۔ ساتھ میں ہم اس شخص کی چھان بین کر رہے ہیں جسے یہ منشیات سپلائی کرنے کے لیے سہارنپور آیا تھا۔