Ukraine War یوکرین کے رہائشی عمارت پر روس کا میزائل حملہ، سات افراد ہلاک

یوکرین کے داخلی امور کے وزیر ایگور کلیمینکو کے مطابق روس کی جانب سے میزائل حملوں میں 7 افراد ہلاک اور 2 بچوں سمیت 67 افراد زخمی ہوگئے۔ روس یوکرین جنگ گزشتہ برس 24 فروری سے جاری ہے۔

کیف: روس نے مشرقی یوکرین کے شہر پوکرووسک پر میزائل حملہ کردیا جس کے نتیجے میں رہائشی عمارت سمیت کئی عمارتوں کو شدید نقصان پہنچا اور 7 افراد ہلاک ہوگئے۔ خبررساں ادارے ’اے ایف پی‘ کی رپورٹ کے مطابق حملوں کے بعد ریسکیو اہلکار پوکروسک میں تباہ شدہ عمارتوں کے ملبے میں امدادی سرگرمیوں میں مصروف نظر آئے۔ پوکروسک مشرقی فرنٹ لائن سے صرف 50 کلومیٹر کے فاصلے پر واقع ہے، جہاں روس کی جانب سے کنٹرول حاصل کرنے اور یوکرین کے حملوں کو پسپا کرنے کا دعویٰ کیا جارہا ہے۔

ڈونیٹسک کے علاقے کی فوجی انتظامیہ کے سربراہ پاولو کیریلینکو نے بتایا کہ 40 منٹ کے فرق سے 2 میزائل داغے گئے جس کے نتیجے میں رہائشی عمارتوں، ایک ہوٹل، دکانوں اور انتظامیہ کی عمارتوں کو نقصان پہنچا۔ وہاں موجود ریسکیو اہلکاروں کو پانچ منزلہ عمارت کے ملبے تلے زندہ بچ جانے والے افراد کو نکالتے اور زخمیوں کو ایمبولینسوں میں لے جاتے دیکھا گیا۔ یوکرین کے داخلی امور کے وزیر ایگور کلیمینکو کے مطابق روس کی جانب سے میزائل حملوں میں 7 افراد ہلاک اور 2 بچوں سمیت 67 افراد زخمی ہوگئے۔ قابل ذکر ہے کہ روس یوکرین جنگ گزشتہ برس 24 فروری سے جاری ہے۔

ایگور کلیمینکو نے مزید بتایا کہ ہلاک ہونے والوں میں ڈونیٹسک علاقے کا ایک اعلیٰ سطح کا ایمرجنسی عہدیدار بھی شامل ہے۔ بار بار گولہ باری کے شدید خطرے کی وجہ سے امدادی کارکنان رات کے وقت کام معطل کرنے پر مجبور ہوگئے تھے، آج ایگور کلیمینکو نے بتایا کہ ہم ملبہ ہٹانے کا کام دوبارہ شروع کر رہے ہیں۔ یوکرین کے صدر ولادیمیر زیلنسکی نے روس کی جانب سے رہائشی عمارت کو نشانہ بنائے جانے کی تصدیق کرتے ہوئے سوشل میڈیا پر ایک ویڈیو شیئر کی جس میں شہری زخمیوں کی مدد میں مصروف نظر آئے اور ریسکیو اہلکار عمارت کا ملبہ ہٹاتے دکھائی دیے جس کی اوپری منزل تباہ ہوچکی تھی۔

فوٹیج میں ایک دوسری عمارت بھی دکھائی دی جسے میزائل حملے کے نتیجے میں شدید نقصان پہنچا، جنگ سے قبل اس شہر کی آبادی 60 ہزار کے لگ بھگ تھی۔ دوسری جانب روس کا کہنا ہے کہ اس نے حال ہی میں شمال مشرقی یوکرین میں کوپیانسک کی جانب 3 کلومیٹر پیش قدمی کی ہے جو پوکروسک کے شمال میں 150 کلومیٹر اور روسی سرحد سے چند درجن کلومیٹر دور واقع ہے۔(یو این آئی)