Hamas Israel War چوبیس گھنٹوں سے بھی کم وقت میں دوسو چھپن فلسطینی ہلاک

اسرائیلی فضائیہ غزہ پر لگاتار بم برسا رہی ہے۔ اقوام متحدہ اور کئی ممالک کی اپیل کے باوجود اسرائیل اسکولوں، اسپتالوں کو بھی نشانہ بنا رہا ہے۔ Israeli forces targeted Gaza City’s Tal al-Hawa neighbourhood and the Red Crescent’s al-Quds Hospital

تل ابیب:غزہ پر اسرائیلی بمباری میں مہلوکین کی تعداد دو ہزار سے تجاوز کر گئی ہے۔ ہزاروں لوگ زخمی ہیں۔ ایسے میں غزہ کےاسپتالوں کے مطابق، 24 گھنٹوں سے بھی کم عرصے میں اسرائیلی فضائی حملوں میں 20 بچوں سمیت کم از کم 256 افراد ہلاک اور 1,788 زخمی ہوئے ہیں۔ فلسطینی خبر رساں ایجنسی وفا کے مطابق اسرائیلی فورسز نے غزہ شہر کے تل الحوا اور ہلال احمر کے القدس اسپتال کو نشانہ بنایا جہاں سیکڑوں خاندان اسرائیلی بمباری سے تحفظ کے لیے پناہ لیے ہوئے تھے۔ وفا نے رپورٹ کیا کہ بمباری نے پوری پٹی میں درجنوں مکانات اور رہائشی عمارتیں بھی تباہ کر دیے۔ اس میں کہا گیا ہے کہ جنوب میں ناصر اور ابو یوسف النجار اسپتال حملوں سے تباہ ہونے کے بعد زخمیوں کا علاج کرنے کے قابل نہیں رہے۔

ان حالات میں دنیا بھر میں لوگ فلسطینیوں کی حمایت اور اسرائیل کی خلاف سڑکوں پر مظاہرے کررہے ہیں۔ نیویارک کے ٹائمز اسکوائر پر ہزاروں افراد نے فلسطینیوں کے ساتھ اظہار یکجہتی کے لیے ریلی نکالی جبکہ سٹی یونیورسٹی نیویارک کے طلبا بھی فلسطینیوں کی حمایت میں نکلے۔ ریلی میں طلباء نے فری فلسطین کے نعرے لگائے۔ برطانیہ کی آکسفورڈ یونیورسٹی میں بھی فلسطین میں اسرائیلی بمباری کے خلاف مظاہرہ کیا گیا جس میں مختلف رنگ و نسل کے سینکڑوں افراد نے شرکت کی اور فلسطینیوں پر ہورہےمظالم کے خلاف آواز اٹھائی۔ اٹلی میں بھی بڑی تعداد میں لوگوں نے فلسطینیوں کی حمایت میں احتجاج کیا اور سڑکوں پر آگئے جبکہ جرمنی کے شہر میونخ میں پابندی کے باوجود سینکڑوں افراد اسرائیل کے حملوں کے خلاف سراپا احتجاج رہے۔

دوسری جانب، اسرائیل کی فلسطینیوں کو دی گئی ڈیڈ لائن کے باعث غزہ کی پٹی میں 10 لاکھ سے زیادہ فلسطینی آج نقل مکانی کے مرحلے سے گزر رہے ہیں۔ اقوام متحدہ کے اندازے کے مطابق اب تک لگ بھگ دسیوں ہزار فلسطینی نقل مکانی کر چکے ہیں۔ اس اعلان کے بعد جنوب کی جانب نقل مکانی کے لیے غزہ کے پیدل شہریوں اور گاڑیوں کی لمبی قطاریں لگ گئی ہیں۔ وہیں، اسرائیلی وزیر اعظم بنجمن نیتن یاہو نے خبردار کیا ہے کہ اسرائیل کی جانب سے حالیہ دنوں میں غزہ پر اب تک کی سب سے شدید بمباری صرف ایک شروعات ہے۔