7 اکتوبر کے حملے میں زندہ بچ جانے والے اسرائیلی فوج، سیکیورٹی فورسز کے خلاف مقدمہ کریں گے

civil suit against Israel سات اکتوبر کو سپرنووا میوزک فیسٹیول میں شریک سینکڑوں افراد حملے میں ہلاک ہوئے تھے۔ اس حملے میں زندہ بچ جانے والے 42 افراد نے اسرائیلی فوج کے خلاف ہرجانے کے لیے سول سوٹ داخل کیا ہے۔

نیویارک:جنوبی اسرائیل میں سپرنووا میوزک فیسٹیول پر 7 اکتوبر کو ہونے والے حملے میں زندہ بچ جانے والے 42 افراد کے ایک گروپ نے اسرائیلی فوج، اسرائیل کی وزارت دفاع، پولیس فورس اور شن بیٹ انٹلیجنس سروس سے 200 ملین شیکل ( 56 ملین ڈالر) ہرجانے کے لیے سول سوٹ داخل کیا ہے۔

اسرائیلی میڈیا کے مطابق پیر کو دائر کیے گئے اپنے مقدمے میں، مدعیان نے کہا کہ اسرائیلی فوج کے اہلکار ایک فون کال کے ذریعے لوگوں کو متوقع خطرے کے پیش نظر فوری طور پر نکل جانے کی تنبیہ کرسکتے تھے جس سے زندگیاں بچائی جا سکتی تھی۔ قانونی چارہ جوئی میں کہا گیا ہے کہ اسرائیلی حکام کی طرف سے ایک کال سے پروگرام میں شریک مدعی سمیت سینکڑوں لوگوں کو جسمانی اور ذہنی دباو سے بچایا جا سکتا تھا۔

واضح رہے سپرنووا میوزک فیسٹیول میں تقریباً 3,500 افراد نے شرکت کی تھی۔ سات اکتوبر کو مبینہ طور پر حماس کے جنگجوؤں نے حملہ کیا جس میں کم از کم 260 افراد ہلاک اور زخمی ہوئے۔ اس پروگرام میں شریک متعدد افراد کو حماس نے یرغمال بنا لیا تھا۔

کچھ اعداد وشمار کے مطابق، پروگرام میں 4,000 افراد نے شرکت کی تھی۔ شرکاء میں زیادہ تر 30 سال سے کم عمر کے لوگ شامل تھے۔ سپرنووا فیسٹیول جنوبی اسرائیل کے ایک دور دراز علاقے میں منعقد کیا گیا تھا۔ یہ ایک ایسی تقریب تھی جہاں پر رقص، موسیقی، آرٹ اور مشروبات کا نظم کیا گیا تھا۔