کولمبو: سری لنکا کے نومنتخب صدر رانیل وکرما سنگھے نے بدھ کے روز سیاسی جماعتوں کو ملک کو موجودہ معاشی بحران Sri Lanka Economic Crisis سے نکالنے کی کوششوں کے ایک حصے کے طور پر ایک کل جماعتی حکومت بنانے کی دعوت دی۔ صدر مملکت نے یہ بات پارلیمنٹ کے تیسرے اجلاس کے دوران آئین کے آرٹیکل 33 کے تحت حاصل اختیارات کے مطابق حکومت کا پالیسی بیان پیش کرتے ہوئے کہی۔ انہوں نے ارکان پارلیمنٹ سے کہا کہ ’’ملک چلانے کے لیے تمام جماعتوں کو اکٹھا ہونا ہوگا‘‘۔ انہوں نے کہا کہ سری لنکا کو ایک جدید معیشت کی ضرورت ہے اور اسے برقرار رکھنے کے لیے زیادہ دیر تک غیر ملکی قرضوں پر انحصار کرنے کی ضرورت نہیں ہے۔ انہوں نے کہا کہ موجودہ معاشی بحران معیشت میں ضروری اقدامات نہ کرنے کا نتیجہ ہے۔ انہوں نے کہا کہ سری لنکا کو مستقبل کی منصوبہ بندی کرنی ہوگی۔ آئندہ 25 سال کے لیے قومی اقتصادی پروگرام تیار کیا جائے گا۔
صدر رانیل وکرما سنگھے نے بھارت اور وزیر اعظم نریندر مودی کا شکریہ بھی ادا کیا۔ انہوں نے کہا، "میں خاص طور پر ہمارے قریبی پڑوسی، بھارت کی طرف سے اقتصادی بحالی کے لیے ہماری کوششوں میں فراہم کردہ امداد کا ذکر کرنا چاہتا ہوں۔ وزیر اعظم مودی کی قیادت میں حکومت ہند نے ہمیں سانس دی ہے۔ اپنے لوگوں کی طرف سے، میں وزیر اعظم مودی، حکومت اور بھارت کے لوگوں کا شکریہ ادا کرتا ہوں۔" گزشتہ ہفتے، مودی نے صدر وکرماسنگھے کو مبارکباد دی اور کہا تھا کہ بھارت جمہوری طریقے سے استحکام اور معاشی بحالی کے لیے جزیرے کے لوگوں کی جدوجہد میں مدد کرتا رہے گا۔