کولمبو: سری لنکا کے کولمبو شہر میں حکومت مخالف مظاہروں کے دوران تقریباً بیس افراد زخمی ہو گئے۔ ادا ڈیرانہ نیوز چینل نے اسپتال کے ذرائع سے یہ اطلاع دی۔ نیشنل پیپلز پاور (این پی پی) کے انتخابی اتحاد کے زیر اہتمام اتوار کو کولمبو میں ٹاؤن ہال کے قریب ایک احتجاجی مظاہرہ کیا گیا۔ مظاہرین جلد از جلد انتخابات کا مطالبہ کر رہے تھے۔ پولیس نے مظاہرین کو منتشر کرنے کے لیے آنسو گیس اور واٹر کینن کا استعمال کیا، جس کے نتیجے میں 20 کے قریب افراد زخمی ہوگئے۔ اسپتال ذرائع نے ادا ڈیرانہ کو بتایا کہ تمام زخمیوں کو کولمبو کے سرکاری اسپتال لایا گیا ہے۔ اتوار کے احتجاج کے دوران شہر میں کچھ سڑکیں بلاک کر دی گئیں۔
نیشنل پیپلز پاور کے زیر اہتمام ریلی نے صدر رانیل وکرم سنگھے کی حکومت سے جلد از جلد بلدیاتی انتخابات کرانے کا مطالبہ کیا۔ پولیس نے مظاہرین کو منتشر کرنے کی کوشش کی اور وسطی کولمبو کے یونین پلیس ایریا میں دو بار واٹر کینن اور آنسو گیس کے گولوں کا استعمال کیا۔ پولیس نے این پی پی لیڈر انورا کمار دسانائیک سمیت 26 لوگوں کو اتوار کی رات 8 بجے تک صدر کے دفتر اور راشٹرپتی بھون کے آس پاس کے علاقوں میں داخل ہونے سے روک دیا۔ اس کے لیے پولیس نے کولمبو فورٹ مجسٹریٹ کورٹ سے احکامات حاصل کیے۔ حزب اختلاف کی جماعتیں صدر رانیل وکرم سنگھے پر الزام لگا رہی ہیں کہ وہ شکست کے خوف سے انتخابات نہ کرانے کے لیے ریاستی عہدیداروں اور الیکشن کمیشن کو متاثر کر رہے ہیں۔