Attack in Sudan سوڈان کے اومدرمان میں حملہ، سولہ شہریوں کی موت

سوڈان کے شہر اومدرمان میں ہوئے فضائی حملے میں کم از کم 16 افراد ہلاک ہو گئے ہیں۔ اقوام متحدہ نے کہا ہے کہ سوڈان میں انسانی حالات مکمل تباہی میں تبدیل ہو چکے ہیں۔ Attack in Omdurman City

خرطوم: سوڈان کی راجدھانی خرطوم کے مغرب میں واقع اومدرمان شہر کے ایک محلے میں منگل کو فضائی اور توپخانے کے حملوں میں کم از کم 16 شہری ہلاک ہوگئے۔ ایک مزاحمتی کمیٹی نے یہ اطلاع دی۔ نوجوانوں کے ایک مقبول گروپ اومباڈا کی مزاحمتی کمیٹی نے ایک بیان میں کہا ہے کہ اومدرمان میں ’’اومباڈا محلے میں اس غیر جنگ میں عام شہری مارے گئے‘‘۔ بیان میں کہا گیا ہے کہ حملوں کی وجہ سے اومدرمان کے مقامی بازار سوق لیبیا میں کئی دیگر زخمی بھی ہوئے۔ دریں اثنا، اقوام متحدہ نے کہا ہے کہ سوڈان میں انسانی حالات مکمل تباہی میں تبدیل ہو چکے ہیں۔

سوڈان میں اقوام متحدہ کے انسانی ہمدردی کے کوآرڈینیٹر کلیمینٹائن انکیٹا -سلامی نے منگل کو ایک بیان میں کہا’’سوڈان میں جنگ کے آغاز کے کل کو 100 دن پورے ہو گئے، ایک ایسا بحران جس نے ایک سنگین انسانی صورتحال کو ایک مکمل تباہی میں بدل دیا۔‘‘ بیان میں کہا گیا ہے کہ انسانی برادری سوڈان کے لوگوں کی حمایت کے اپنے عزم پر ثابت قدم ہے اور انتہائی مشکل حالات میں مدد فراہم کرنے کے لیے زبردست اور دلیرانہ کوششیں کر رہی ہے۔ اقوام متحدہ کے اہلکار نے کہا ’’پھر بھی امدادی کارکن تشدد اور بدسلوکی کی ہولناک کارروائیوں سے محفوظ نہیں ہیں‘‘۔

انہوں نے کہا کہ سوڈان میں تنازع شروع ہونے کے بعد سے کم از کم 18 امدادی کارکن ہلاک اور متعدد زخمی ہو چکے ہیں۔ بیان کے مطابق، انسانی سہولیات پر بھی حملہ کیا گیا، کم از کم 50 گوداموں کو لوٹ لیا گیا اور 82 دفاتر میں توڑ پھوڑ کی گئی۔ سوڈان کی وزارت صحت کے جاری کردہ اعداد و شمار کے مطابق، سوڈان میں 15 اپریل سے خرطوم اور دیگر علاقوں میں سوڈانی فوج اور نیم فوجی ریپڈ سپورٹ فورسز کے درمیان مہلک جھڑپیں ہو رہی ہیں، جس کے نتیجے میں تین ہزار سے زائد افراد ہلاک اور چھ ہزار سے زائد لوگ زخمی ہو چکے ہیں۔

یو این آئی