Operation Against Yemen's Houthis: یمن میں سعودی اتحادی فورسز کا حوثیوں کے خلاف ایک اور آپریشن کا آغاز

شورش زدہ یمن میں حوثیوں کے خلاف سعودی اتحادی فورسز نے آپریشن شروع کیا ہے۔ سعودی اتحادی فورسز کی جانب سے یمن کے شہر صنعا اور حدیدہ میں حوثیوں کے ٹھکانوں پر حملے جاری ہیں۔

سعودی اتحادی فورسز کے مطابق ان حملوں کا مقصد عالمی توانائی کے ذرائع کی حفاظت اور سپلائی کو یقینی بنانا ہے۔ سعودی اتحادی فورسز کا یہ بھی کہنا ہے کہ حوثیوں کو سعودی عرب پر حملے کا خمیازہ بھگتنا پڑے گا۔واضح رہے کہ سعودی عرب کے فضائی دفاعی نظام نے گزشتہ روز حوثیوں کے ڈرونز اور بیلسٹک میزائل حملے کو ناکام بناتے ہوئے ایک بیلسٹک میزائل اور دس ڈرونز تباہ کر دیئے۔ سعودی اتحادی فورسز برائے یمن نے ایک بیان میں کہا ہے کہ مملکت کے جنوبی علاقے کو نشانہ بنانے کی حوثیوں کی ایک بڑی کوشش ناکام بنائی ہے۔ حوثیوں نے نو بارود بردار ڈرونز سے حملوں کی کوشش کی جنہیں تباہ کر دیا گیا ہے۔ سعودی اتحادی فورسز نے کہا ہے کہ حوثیوں نے پہلا حملہ جمعہ کی صبح کیا، جس میں 6 بارود بردار ڈونز کو ہدف تک پہنچنے سے پہلے تباہ کر دیا گیا، جمعہ کی دوپہر حوثیوں نے 2 بارود بردار ڈرون بھیجے، انہیں بھی ہدف پر پہنچنے سے پہلے ہی تباہ کر دیا گیا۔

سعودی دفاعی نظام نے جازان پر بیلسٹک میزائل اور نجران شہر پر بارود بردار ڈرون کو بھی ہدف پر پہنچنے سے پہلے تباہ کیا ہے۔ عرب اتحاد کے ترجمان نے بتایا ہے کہ مملکت کے جنوبی، وسطی اور مشرقی علاقوں کو نشانہ بنانے کی کوشش کی گئی، ان حملوں کو ناکام بنایا گیا ہے۔ ترجمان نے کہا ہے کہ حوثی ملیشیا جارحانہ حملے کر کے صورتِ حال کو گمبھیر بنانے کی کوشش کر رہی ہے اور توانائی کی رسد میں خلل پیدا کرکے عالمی معیشت کو متاثر کرنے کے درپے ہے۔ عرب اتحاد نے تیل کی تنصیبات اور سول اداروں پر جارحانہ حملوں کی کوششوں کی مذمت کی ہے۔

یو این آئی