Russia Ukraine War روس کا یوکرین پر مزید حملوں کا عندیہ

روسی صدر ولادیمیر پوتن نے کریمیا کو روس سے ملانے والے کیرچ پُل پر دھماکے کو دہشت گردی قرار دیتے ہوئے اس واقعہ کا ذمہ دار یوکرین کو ٹھہرا دیا۔ اور یوکرین کو خبردار کرتے ہوئے کہا کہ اگر یوکرین نے روس کے خلاف مزید دہشت گردانہ حملوں کی منصوبہ بندی کی تو زبردست فوجی جواب دیا جائے گا۔ Russia Ukraine War

ماسکو: روس کے صدر ولادیمیر پوتن نے یوکرین کو خبردار کرتے ہوئے کہا کہ اگر یوکرین نے روس کے خلاف مزید دہشت گردانہ حملوں کی منصوبہ بندی کی تو زبردست فوجی جواب دیا جائے گا۔ غیرملکی خبررساں ادارے کی رپورٹ کے مطابق پوتن نے تصدیق کی کہ فوجیوں نے یوکرینی توانائی کے ذرائع، فوجی کنٹرول اور مواصلاتی نظام پر طویل فاصلے تک مار کرنے والے انتہائی درست طریقے سے اپنے اہداف کو نشانہ بنانے والے ہتھیاروں کے ساتھ حملہ کیا ہے۔Russia Ukraine War

صدر پوتن نے سلامتی کونسل کے مستقل ارکان کے اجلاس میں کہا کہ ’یوکرین کی خفیہ سروسز نے روس میں کرسک جوہری پاور پلانٹ کے خلاف تین دہشت گردانہ کارروائیاں کیں اور ہائی وولٹیج پاور لائنوں کو اڑا دیا۔ روسی صدر نے مزید کہا کہ اگر ہماری سرزمین پر دہشت گردانہ حملے کرنے کی مزید کوششیں کی تو روس اور سختی سے فوجی جواب دے گا۔ انہوں نے یوکرین کو خبردار کرتے ہوئے کہا کہ مستقبل میں بڑے پیمانے پر روس کے خلاف پیدا ہونے والے خطرات کے مطابق جواب دے گا۔

یاد رہے روسی فوج کی جانب سے یہ حملہ دو دن بعد ہوا جب دہشت گردانہ حملے کے نتیجے میں روس اور کریمیا کے درمیان اسٹریٹجک کریمیا پل کو نقصان پہنچا تھا۔ روس کی جانب سے اس پُل کا استعمال یوکرین میں سرگرم روسی فوجیوں کو فوجی ساز و سامان اور گولہ بارود بھیجنے کے لیے کیا جاتا رہا ہے جبکہ فوجی دستے بھی یہیں سے گزرتے تھے۔ واضح رہے کہ روسی صدر ولادیمیر پوتن نے 2014 میں یوکرین کے علاقے کریمیا پر قبضے کے بعد 2018 میں کیرچ پُل کا افتتاح کیا تھا۔

غیر ملکی خبررساں ایجنسی کی رپورٹ کے مطابق روسی صدر نے ایک بیان میں کہا کہ کریمیا کو روس سے ملانے والے پُل پر دھماکے کی منصوبہ سازی اور معاونت یوکرین کی خفیہ ایجنسیوں نے کی ہے۔ روس کی تحقیقاتی کمیٹی کے سربراہ الیگزینڈر باسٹریکن سے گفتگو کرتے ہوئے انہوں نے کہا کہ اس میں کوئی شک نہیں کہ یہ ایک دہشت گردی کی کارروائی تھی، یوکرین کی خفیہ ایجنسیوں کا مقصد روس کے سول انفرااسٹرکچر کے اہم حصے کو تباہ کرنا تھا۔

روسی سیکیورٹی کونسل کے ڈپٹی چیئرمین دمتری میڈویف نے کہا کہ دہشت گردی کی اس کارروائی کے ذمہ داروں کو مار دیا جانا چاہیے۔ سرکاری نیوز ایجنسی ’ٹاس‘ کے مطابق انہوں نے مزید کہا کہ ’روس اس جرم کا جواب دہشت گردوں کو براہ راست مار کر ہی دے سکتا ہے، بالکل اسی طرح جیسے دنیا بھر میں ہوتا ہے اور روسی شہری بھی یہی توقع رکھتے ہیں‘۔

دوسری جانب یوکرین کے صدر ولادیمیر زیلینسکی کے مشیر میخائیلو پوڈولیاک نے ولادیمیر پوتن کے الزامات کی تردید کی ہے۔انہوں نے کہا کہ یہاں صرف ایک دہشت گرد ریاست ہے اور پوری دنیا جانتی ہے کہ وہ کون ہے۔ (یو این آئی)