Niger Coup نائجر میں تختہ پلٹ کا بھارت کے تعلقات پر براہ راست اثر پڑنے کا امکان نہیں، ماہرین

سابق بھارتی سفیر انل تریگنایت نے کہا کہ نائجر میں بغاوت کا دونوں ممالک کے باہمی تعلقات پر براہ راست اثر نہیں پڑے گا، کیونکہ وہاں بھارتی امداد اور صلاحیت سازی کی کوششوں بڑے پیمانے پر سراہا جاتا ہے۔ Impact of Niger Coup on India

نئی دہلی:حال ہی میں نائجر کی فوج نے بغاوت کرتے ہوئے منتخب حکومت کا تختہ پلٹ دیا۔ بھارت کے سابق سفیر انل تریگنایت نے بھارت اور نائجر کے تعلقات پر اس کے اثرات پر روشنی ڈالی۔ تریگنایت نائجر، لیبیا، اردن اور سویڈن میں بھارتی مشنوں میں خدمات انجام دے چکے ہیں۔ بغاوت کے بعد نائجر کے صدر محمد بازوم کو حراست میں لے لیا گیا۔ اس پر تریگنایت نے بھارت اور نائجر کے تعلقات کے بارے میں ایک پر امید نظریہ اپنایا۔

تریگنایت نے کہا کہ 'جہاں تک بھارت کا تعلق ہے تو اس بغاوت کا ہمارے دوطرفہ تعلقات پر براہ راست اثر نہیں پڑے گا کیونکہ بھارتی امداد اور صلاحیت سازی کی کوششوں کو وہاں بڑے پیمانے پر سراہا جاتا ہے۔ اسی کے ساتھ انہوں نے کہا کہ میں اس معاملے میں بھارت کے لیے کوئی براہ راست کردار نہیں دیکھتا، لیکن اس میں علاقائی سطح پر اور اقوام متحدہ کی قیادت میں پہل ہونی چاہیے، جن کے کامیاب ہونے کے امکانات زیادہ ہیں۔

نائجر میں حالیہ بغاوت کے بعد فوجی گروپ نے صدر بازوم کو حراست میں لے لیا۔ اس سے خطے میں سیاسی عدم استحکام کے خدشات بڑھ گئے۔ بدھ کے روز نائجر میں تختہ پلٹ کا اعلان کیا گیا۔ فوجی گروپ نے نئی حکومت کے قیام کا اعلان بھی کیا۔ مغربی افریقی رہنما اس کے بعد نائجر پر ایک ہنگامی سربراہی اجلاس کے لیے نائیجیریا میں جمع ہوئے، جہاں ملک کے منتخب صدر کو بحال کرنے کا مطالبہ کیا گیا۔ وہیں فوجی بغاوت کے رہنماؤں نے منتخب صدر کی بحالی کے مطالبات کی مخالفت کی۔

مغربی افریقی ملک میں ہونے والی یہ بغاوت امریکہ اور یورپی ممالک کے لیے حیران کن ہے کیونکہ یہ طاقتیں افریقہ کے ساحل کے علاقے میں اسلام پسند عسکریت پسندوں کے خلاف لڑائی میں نائجر کے صدر اور فوج کے ساتھ مل کر رہی تھیں۔ سابق بھارتی سفیر نے مزید کہا، 'نائجر میں موجودہ بغاوت افسوسناک ہے۔ تاہم یہ لوگوں کی اپنی حکومتوں سے بیزاری کا نتیجہ بھی ہے اور یہ خطے میں تیزی سے ہو رہا ہے۔ اس بغاوت کے علاقائی طاقتوں اور سابق نوآبادیاتی طاقت فرانس، افریقی یونین اور مغربی افریقی ریاستوں کی اقتصادی کمیونٹی (ECOWAS) پر دور رس اثرات مرتب ہوں گے۔

واضح رہے کہ نائجر 15 رکنی ریاستی بلاک میں چوتھا ملک ہے جس نے پچھلے تین برسوں کے دوران بغاوت کی۔ دریں اثنا، گزشتہ ہفتے بھارتی وزارت خارجہ کے ترجمان ارندم باغچی نے کہا کہ حکومت نائجر میں ہونے والی پیش رفت پر نظر رکھے ہوئے ہے۔ انہوں نے یہ بھی کہا کہ مغربی افریقی ملک میں رہنے والے تقریباً 250 بھارتی محفوظ ہیں۔ فرانس سمیت کئی یورپی ممالک نے نائجر سے اپنے شہریوں کو نکالنا شروع کر دیا ہے۔ اس سے قبل، بھارت نے نائجر کو ٹرانسپورٹ، بجلی، شمسی توانائی اور پینے کے صاف پانی کے منصوبوں کے لیے 96.54 ملین امریکی ڈالر کا قرض فراہم کیا تھا۔