اسرائیل نے غزہ کی سب سے قدیم، سب سے بڑی مسجد کو تباہ کر دیا

اسرائیلی فضائیہ نے غزہ کی سب سے بڑی اور 1400 سالہ قدیم العمری گرینڈ مسجد کو تباہ کردیا ہے۔ اسرائیلی فورسز نے اب تک غزہ پٹی میں 104 مساجد اور تین گرجا گھروں کو تباہ کیا ہے۔ Attack on al-Omari Grand Mosque

غزہ: اسرائیلی لڑاکا طیاروں نے جمعہ کو غزہ شہر کی قدیم اور سب سے بڑی مسجد کو تباہ کر دیا۔ یہ اطلاع فلسطینی سیکورٹی ذرائع نے دی۔ ذرائع نے ژنہوا کو بتایا ’’غزہ پٹی کی سب سے بڑی اور قدیم مسجد العمری گرینڈ مسجد، اسرائیلی حملوں میں بڑی حد تک تباہ ہو گئی۔‘‘ عمری مسجد کی تعمیر 1400 سال پہلے سے بھی پہلے ہوئی تھی، جو تقریباً 4,100 مربع میٹر کے رقبے پر محیط ہے۔ تین ہفتے قبل اسرائیلی توپ خانے کے حملے میں اس کی مینار تباہ ہو گئی تھی۔ غزہ پر حکمرانی کرنے والے عسکریت پسند گروپ حماس نے ’’غزہ شہر میں ایک اہم تاریخی یادگار اور ایک مذہبی مقام‘‘ کو نشانہ بنانے والے اسرائیلی حملوں کی مذمت کی۔ اس میں کہا گیا ہے کہ اسرائیلی فورسز نے اب تک غزہ پٹی میں 104 مساجد اور تین گرجا گھروں کو تباہ کردیا ہے۔

فلسطینی وزیر ثقافت عتیق ابو سیف نے کہا کہ اسرائیل کے حملوں نے غزہ شہر کے پرانے شہر کا بیشتر حصہ تباہ کر دیا، جس میں تاریخی عمارتیں، مساجد، عجائب گھر اور آثار قدیمہ شامل ہیں۔ غزہ میں قائم وزارت صحت کے مطابق، غزہ 7 اکتوبر سے بڑے پیمانے پر اسرائیلی محاصرے اور بمباری کی زد میں ہے، جس میں 17,000 سے زیادہ فلسطینی ہلاک ہو چکے ہیں۔

یو این آئی