Pakistan Cipher Case سائفر کیس میں عمران خان کی ضمانت کی درخواست مسترد

اسلام آباد ہائی کورٹ نے سائفر کیس میں تحریک انصاف پارٹی کے سربراہ عمران خان کی درخواست ضمانت کو مسترد کر دیا ہے۔ عدالت نے سائفر کیس کے اخراج کی درخواست بھی مسترد کر دی۔ Pakistan Tahreek e insaf

اسلام آباد:اسلام آباد ہائیکورٹ نے سائفر کیس میں پاکستان کے سابق وزیراعظم و چیئرمین پی ٹی آئی عمران خان کی ضمانت کی درخواست کو مسترد کر دیا ہے۔ اسلام آباد ہائی کورٹ کے چیف جسٹس عامر فاروق نے یہ فیصلہ سنایا۔ عدالت نے پاکستان تحریک انصاف کے چیئرمین عمران خان کی اخراج مقدمہ کی درخواست بھی مسترد کر دی۔ سائفر کیس کی سماعت کررہی آفیشل سیکرٹ ایکٹ کی خصوصی عدالت نے پہلے عمران خان کی درخواست ضمانت مسترد کی تھی جس کے خلاف پاکستان کے سابق وزیراعظم نے اسلام آباد ہائیکورٹ سے رجوع کیا تھا۔

واضح رہے کہ گزشتہ روز اسلام آباد ہائیکورٹ نے عمران خان کی سائفر کیس کا ٹرائل روکنےکی درخواست کو بھی مسترد کردیا تھا۔ یہی نہیں اسلام آباد ہائیکورٹ نے چیئرمین پی ٹی آئی پر فرد جرم عائد کرنےکے خلاف درخواست ہدایات کے ساتھ نمٹاتے ہوئےکہا تھا کہ چیئرمین پی ٹی آئی کو شفاف ٹرائل کا حق دیا جائے۔ چیف جسٹس عامر فاروق نے محفوظ فیصلہ سنایا ہے۔ خیال رہے کہ عدالت نے فریقین کے دلائل سننے کے بعد 16 اکتوبر کو فیصلہ محفوظ کر لیا تھا۔

پاکستان کے سابق وزیر اعظم اور چیئرمین پاکستان تحریک انصاف عمران خان نے امریکہ میں پاکستانی سفیر کے مراسلے یا سائفرکو بنیاد بنا کر ہی اپنی حکومت کے خلاف سازش کا بیانیہ بنایا تھا جس میں عمران خان نے دعویٰ کیا تھا کہ ان کی حکومت کے خاتمے میں امریکہ کا ہاتھ ہے، تاہم قومی سلامتی کمیٹی کے اجلاس میں سائفر کو لے کر پی ٹی آئی حکومت کے مؤقف کی تردید کی جاچکی ہے۔ عمران خان سائفر کیس کی وجہ سے جیل میں ہیں، انہیں 5 اگست کو لاہور سے گرفتار کیا گیا تھا۔ گزشتہ سال اپریل میں اقتدار سے ہٹائے جانے کے بعد سے عمران خان کے خلاف 150 سے زائد مقدمات درج کیے جا چکے ہیں۔