Pak Resolution Against Religious Hatred پاکستانی قرارداد کو بھارت کی تائید، اقوام متحدہ میں مذہبی منافرت کے خلاف رزولوشن منظور

اقوام متحدہ کی انسانی حقوق کونسل میں پاکستان نے او آئی سی کی جانب سے قرارداد کا مسودہ پیش کیا تھا، جس کی حمایت میں بھارت سمیت 28 ممالک نے ووٹ دیا جب کہ امریکہ اور یوروپی یونین سمیت 12 ارکان نے مخالفت کی اور 7 ارکان نے ووٹنگ میں حصہ نہیں لیا۔

اقوام متحدہ: اقوام متحدہ کی انسانی حقوق کونسل میں قرآن پاک کی بے حرمتی کے خلاف پاکستان کی قرارداد منظور کرلی گئی۔ ذرائع کے مطابق پاکستان کی قرارداد میں قرآن پاک کی بے حرمتی سمیت مذہبی منافرت کی مذمت کی گئی۔ قرارداد میں قرآن پاک کی بے حرمتی میں ملوث عناصر کو انصاف کے کٹہرے میں لانے پر زور دیا گیا اس کے علاوہ ریاستوں پر مذہبی منافرت کی روک تھام کے لیے قوانین اپنانے پر بھی زور دیا گیا۔

اقوام متحدہ کی انسانی حقوق کونسل میں پاکستان کی جانب سے قرارداد کی حمایت میں بھارت سمیت 28 ممالک نے ووٹ دیا جب کہ قرارداد کی 12 ارکان نے مخالفت کی۔ پاکستان کی جانب سے قرارداد پر7 ارکان نے ووٹنگ میں حصہ نہیں لیا۔ امریکا اور یورپی یونین نے پاکستان کی جانب سے قرارداد کی مخالفت کی اور کہا کہ یہ انسانی حقوق اور آزادی اظہار کے بارے میں ان ممالک کے نظریات سے متصادم ہے۔

خیال رہے کہ سویڈن کے دارالحکومت اسٹاک ہوم کی مسجد کے باہر عید الاضحیٰ کے روز قرآن پاک کو نذرآتش کرنے اور بے حرمتی کا واقعہ پیش آیا تھا۔ جس کے بعد او آئی سی سمیت مسلم ریاستوں نے اس جرم کے خلاف کارروائی کا مطالبہ کیا تھا۔ دارصل اسٹاک ہوم کی پولیس نے عراق سے تعلق رکھنے والے شہری کو کئی بار قرآن پاک نذر آتش کرنے کی اجازت دینے سے انکار کیا تھا لیکن مقامی عدالت نے پولیس کے فیصلے کو آزادی اظہار رائے کے خلاف قرار دیا اور اسے اس مذموم حرکت کی اجازت مل گئی۔ (یو این آئی مشمولات کے ساتھ)