مالدیپ کے لیے بھارت 911 نمبر کی طرح ہے: مالدیپ کی سابق وزیر دفاع

Mariya Ahmed Didi On Maldives India Relation مالدیپ کی سابق وزیر دفاع ماریہ احمد دیدی نے وزیر اعظم نریندر مودی پر مالدیپ کے رکن پارلیمنٹ کے ایکس پر کیے گئے تضحیک آمیز پوسٹ تنازع پر مالدیپ حکومت کو گھیرا ہے۔ انہوں نے کہا کہ بھارت ہمارے لئے 911 کال (ایمرجنسی نمبر) کی طرح رہا ہے۔ جب بھی ہمیں ضرورت ہوتی ہے، ہم فون کرتے ہیں اور آپ سب ہماری مدد کے لیے آتے ہیں۔ جب آپ ایسے دوستوں کے بارے میں ایسے تضحیک آمیز تبصرے دیکھتے ہیں تو سب کو شرمندگی ہوتی ہے۔

مالے: مالدیپ کی حکومت کو وزیر اعظم نریندر مودی کے خلاف توہین آمیز ریمارکس کے معاملے میں اپنے ہی لیڈروں کی مخالفت کا سامنا ہے۔ اس معاملے میں مالدیپ کی سابق وزیر دفاع ماریہ احمد دیدی کا بیان بھی سامنے آیا ہے۔ انہوں نے کہا کہ وزیر اعظم نریندر مودی کے خلاف تضحیک آمیز تبصرے مالدیپ حکومت کی 'چھوٹی سوچ ' کی عکاسی کرتے ہیں۔ انہوں نے کہا کہ بھارت مالدیپ کا قابل اعتماد اتحادی رہا ہے۔ سابق وزیر دفاع ماریہ احمد دیدی نے کہا کہ، بھارت نے ہمیں اکثر دفاع سمیت مختلف شعبوں میں مدد فراہم کی ہے۔ ہم ایک طویل عرصے سے دوست ہیں۔ ایسے بیانات ہمارے تعلقات کو کمزور کرنے کی کوشش نظر آتے ہیں۔

مالدیپ کی سابق وزیر دفاع ماریہ احمد دیدی نے مزید کہا کہ، مالدیپ کے لیے بھارت نہ صرف ایک ساتھی کے طور پر آگے آیا ہے بلکہ ہنگامی حالات میں مددگار کے طور پر بھی آگے آیا ہے۔ انہوں نے کہا کہ بھارت ہمارے لیے '911 کال' کی طرح ہے (مصیبت کے وقت مدد کے لیے اس نمبر کو ڈائل کیا جاتا ہے)۔ انہوں نے کہا کہ بھارت نے ہمیشہ ہماری حفاظت کی ہے۔

ماریہ احمد دیدی نے توہین آمیز تبصروں پر مایوسی کا اظہار کیا۔ انہوں نے کہا کہ یہ موجودہ حکومت کی کوتاہی ہے۔ ہمارا ملک سب کا دوست ہے، لیکن، ہم اس بات سے انکار نہیں کر سکتے کہ ہماری سرحدیں بھارت کے ساتھ ہیں۔ ہم ایک جیسے سیکیورٹی خدشات کا اشتراک کرتے ہیں۔ بھارت نے ہمیشہ ہماری مدد کی ہے۔

ماریہ احمد دیدی نے کہا، بھارت دفاعی شعبے میں صلاحیت بڑھانے میں ہماری مدد کر رہا ہے، ہمیں آلات فراہم کر رہا ہے اور ہمیں مزید خود انحصار بنانے کی کوشش کر رہا ہے۔ انہوں نے کہا کہ، مالدیپ اور بھارت جمہوریت اور انسانی حقوق کے معاملے میں ہم خیال ممالک ہیں۔ انہوں نے کہا کہ، موجودہ حکومت کی چھوٹی سوچ ہے۔ ہم واقعی بھارت کے ساتھ اپنے پرانے تعلقات کو معمولی نہیں سمجھ سکتے۔