Western Talks with Taliban طالبان کے ساتھ مذاکرات میں بھارت اور پاکستان ایک میز پر

اوسلو میں ہونے والے مذاکرات میں دیگر ممالک کے ساتھ ساتھ بھارت اور پاکستان کے خصوصی سفیروں نے طالبان کے نمائندوں سے ملاقات کی۔ اس موقعے مختلف ممالک کے سفیروں نے طالبان سے اقوام عالم سے کیے گئے اپنے وعدوں کو پورا کرنے کا مطالبہ ایک بار پھر دہرایا۔

نئی دہلی: اپنی نوعیت کے پہلے معاملے میں، بھارت اور پاکستان کے خصوصی ایلچیوں نے اوسلو میں طالبان کے نمائندوں سے بات چیت کی۔ وزارت خارجہ کے ایک اہلکار کے مطابق اوسلو میں پیس ریسرچ انسٹی ٹیوٹ کی جانب سے ایک کانفرنس کا انعقاد کیا گیا جس میں بھارت اور پاکستان کے علاوہ کئی دیگر ممالک نے بھی شرکت کی۔ وزارت خارجہ کے اہلکار نے اعتراف کیا کہ طالبان کے نمائندوں سے بھی بات چیت ہوئی ہے۔ تاہم، انہوں نے یہ بھی کہا کہ اس ملاقات کا طالبان حکومت پر بھارت کے موقف سے کوئی تعلق نہیں ہے۔

ایک سوال پر کہ کیا ہندوستان اور پاکستان کے نمائندوں کے درمیان پردے کے پیچھے کوئی بات چیت ہوئی ہے۔ عہدیدار نے کہا کہ دونوں فریقوں کے درمیان کوئی دو طرفہ بات چیت نہیں ہوئی۔ ذرائع کے مطابق ناروے میں دو روزہ سالانہ سربراہی اجلاس کے ایک حصے کے طور پر طالبان حکام نے سول سوسائٹی کے ارکان اور سفارت کاروں سے ملاقات کی۔ اس سے قبل بھارت اور پاکستان نے افغانستان کی صورتحال پر دوحہ میں ہونے والے ماسکو فارمیٹ کے مذاکرات میں حصہ لیا تھا۔ افغانستان میں 20 سالہ جنگ کے بعد سنگین انسانی بحران کے پس منظر میں طالبان حکام نے ناروے کا دورہ کیا۔ یہ دورہ اہمیت کا حامل ہے کیونکہ یہ پہلا موقع ہے جب بھارت اور پاکستان کو کسی یورپی ملک میں ہونے والی بحث میں شرکت کی دعوت دی گئی ہے۔

وزارت خارجہ، دفاع اور داخلہ کے افغان حکام نے ناروے کے سرکاری دورے شروع کیے، جہاں انہوں نے بند کمرے میں ملاقاتیں کیں۔ یہ بات قابل ذکر ہے کہ ان مذاکرات میں طالبان کے خارجہ امور کے ترجمان عبدالقہار بلخی بھی موجود تھے۔ اجلاس کے شرکاء میں امریکہ، برطانیہ، ناروے، قطر، ہندوستان اور پاکستان کے خصوصی ایلچی بھی شامل تھے۔ اقوام متحدہ کے سیکرٹری جنرل افغانستان کی خصوصی نمائندہ روزا اوٹن بائیوا اور افغان سول سوسائٹی کے نمائندے بھی موجود تھے۔

دوسری جانب اس مذاکرات کے خلاف سابقہ افغان سفارت کاروں اور طالبان کے مخالف کارکنوں نے احتجاج کیا۔ مظاہرین نے کہا کہ ایسا لگتا ہے کہ بھارت اور پاکستان کابل میں طالبان کی حکومت کو قانونی حیثیت دینے کی کوشش کر رہے ہیں۔ واضح رہے کہ بھارت سمیت کسی بھی ملک نے ابھی تک طالبان حکومت کو تسلیم نہیں کیا۔