جرمنی میں حماس کارکنوں اور اس کے حامیوں کی جائیدادوں پر چھاپے

جرمن تنظیم سمیڈون پر پابندی کے بعد جرمنی کے برلن سمیت مختلف مقامات پر تنظیم کی جائیدادوں اور حماس حامیوں کے ٹھکانوں پر جرمن پولیس نے چھاپے مارے ہیں۔ جرمن وزیر داخلہ نینسی فیسرکا کہنا ہے کہ ہم بنیاد پرست اسلام پسندوں کے خلاف اپنی مسلسل کارروائی جاری رکھے ہوئے ہیں۔ German government ban on Samidoun

برلن:جرمنی میں سینکڑوں پولیس اہلکاروں نے حماس کے ارکان اور حامیوں کی جائیدادوں پر چھاپہ ماری کی ہے۔ جرمنی نے عسکریت پسند گروپ حماس کی طرف سے یا اس کی حمایت میں کسی بھی سرگرمی پر باقاعدہ پابندی عائد کر دی ہے۔ جرمن حکومت نے 2 نومبر کو پابندی پر عمل درآمد کیا کرتے ہوئے سمیڈون پر پابندی عائد کر دی۔ سمیڈون نے 7 اکتوبر کو حماس کے اسرائیل پر حملہ کرنے کے بعد برلن میں جشن منایا تھا، جس کے بعد جرمنی کی حکومت نے یہ فیصلہ کیا۔

جرمنی کی گھریلو انٹیلی جنس سروس کے ایک اندازے کے مطابق، جرمنی میں حماس کے تقریباً 450 ارکان ہیں۔ ان کی سرگرمیاں ہمدردی کے اظہار اور پروپیگنڈہ سرگرمیوں سے لے کر بیرون ملک تنظیم کو مضبوط کرنے کے لیے مالی اعانت اور فنڈ ریزنگ کی سرگرمیوں تک ہیں۔ جرمن وزیر داخلہ نینسی فیسر نے کہا کہ ہم بنیاد پرست اسلام پسندوں کے خلاف اپنی مسلسل کارروائی جاری رکھے ہوئے ہیں۔ "جرمنی میں حماس اور سمیڈون پر پابندی لگا کر، ہم نے واضح اشارہ دیا ہے کہ ہم اسرائیل کے خلاف حماس کی وحشیانہ دہشت گردی کی تعریف یا حمایت کو برداشت نہیں کریں گے۔"

جرمن وزارت داخلہ نے ایک بیان میں کہا کہ، زیادہ تر برلن میں مارے گئے چھاپوں کا مقصد پابندیوں کو نافذ کرنا اور گروپوں کی مزید تفتیش کرنا تھا۔ برلن اور لوئر سیکسنی، نارتھ رائن ویسٹ فیلیا اور شلیس وِگ ہولسٹائن کی ریاستوں میں 500 پولیس افسران نے کل 16 ٹھکانوں کی تلاشی لی۔ صرف برلن میں، 300 سے زیادہ پولیس افسران نے شواہد اور اثاثے ضبط کرنے کے لیے 11 مقامات پر تلاشی لی۔ سات تلاشیاں حماس اور چار کا سمیڈون سے متعلق تھیں۔ جرمن خبر رساں ایجنسی ڈی پی اے نے رپورٹ کیا کہ تلاشی بنیادی طور پر حماس حامیوں کے گھروں اور فلسطینی ایسوسی ایشن کے احاطے میں کی گئی۔

منگل کے روز، پولیس نے جنوبی جرمن ریاست باویریا میں 17 افراد کے گھروں پر چھاپہ مارا جن پر یہود مخالف نفرت انگیز تقریر اور آن لائن یہودیوں کو نشانہ بنانے کی دھمکیاں پھیلانے کا الزام تھا۔ 16 نومبر کو، جرمن پولیس نے ہیمبرگ میں قائم ایک تنظیم کی تحقیقات میں ملک بھر میں 54 مقامات پر چھاپے مارے جس پر ایرانی قیادت کے نظریے کو فروغ دینے اور ممکنہ طور پر جرمنی میں حزب اللہ کی سرگرمیوں کی حمایت کرنے کا شبہ تھا۔

"ہم اسلام پسند منظر پر گہری نظر رکھے ہوئے ہیں،" فیسر نے کہا۔ اسلام پسند اور سام دشمن یہاں کہیں بھی خود کو محفوظ محسوس نہیں کر سکتے اور نہ ہی ہونا چاہیے۔ واضح رہے امریکی محکمہ خارجہ نے 1997 میں حماس کو دہشت گرد گروپ قرار دیا تھا۔ یورپی یونین اور دیگر مغربی ممالک بھی اسے دہشت گرد تنظیم سمجھتے ہیں۔