کوئٹہ:پاکستان میں بلوچستان کے ضلع خضدار میں منگل کی رات بم دھماکے میں کم از کم دو افراد ہلاک اور آٹھ زخمی ہوگئے۔ وزیر خارجہ بلاول بھٹو زرداری نے اس واقعے کو دہشت گردانہ واقعہ قرار دیا ہے۔ خضدار کے سینئر سپرنٹنڈنٹ آف پولیس (ایس ایس پی) فہد کھوسہ کے حوالے سے ڈان اخبار نے بتایا کہ دھماکہ سلطان روڈ پر تلوار چوک کے نزدیک ہوا۔ ان کا کہنا تھا کہ بم کو گاڑی کے نیچے مقناطیس کے ساتھ جوڑا گیا تھا اور پھر اسے ریموٹ کنٹرول ڈیوائس کے ذریعے اڑا دیا گیا۔ انہوں نے کہا کہ ڈان کے نمائندے واحد شاہوانی کے 20 سالہ بیٹے نوید شاہوانی اور ایک تاجر امان اللہ دھماکے میں ہلاک ہو گئے، جب کہ آٹھ دیگر زخمی ہوگئے۔
انہوں نے بتایا کہ زخمیوں کو نزدیکی اسپتال میں داخل کرایا گيا ہے اور جائے واردات پر بھاری نفری تعینات کرکے فوری تحقیقات شروع کردی گئی ہے۔ ایس ایس پی کا کہنا تھا کہ ابتدائی اطلاعات سے معلوم ہوا ہے کہ دہشت گردوں نے تاجر کو نشانہ بنایا تھا۔ وزیر خارجہ بلاول بھٹو نے ایک بیان میں دہشت گردانہ حملے کی مذمت کی۔ انہوں نے کہا کہ معصوم لوگوں کو نشانہ بنانے والوں کا کسی مذہب یا مسلک سے کوئی تعلق نہیں ہے۔ انہوں نے کہا کہ پاکستان اور اس کی حکومت عسکریت پسندی کے خاتمے کے لیے پرعزم ہے۔