Erdogan on Sweden NATO bid ہم جب فن لینڈ کے بارے میں مختلف بیان دیں گے تو سویڈن میں حیرانگی ہوگی، ترک صدر اردوغان

ترک صدر رجب طیب اردوغان نے سویڈن اور فن لینڈ کی نیٹو رکنیت کے عمل پر تبصرہ کرتے ہوئے کہا کہ اگر سویڈن 120 دہشت گردوں کو ہمارے حوالے نہیں کرتے تو ہم پھر آپ کی نیٹو کی رکنیت کی حمایت نہیں کریں گے اور ہم فن لینڈ کے بارے میں مختلف پیغام دیں گے تو سویڈن میں بڑی حیرانگی ہوگی۔

انقرہ: ترک صدر رجب طیب اردوغان نے سویڈن اور فن لینڈ کی نیٹو کی رکنیت کے بارے میں بیان دیتے ہوئے کہا ہے کہ جب ہم فن لینڈ کے بارے میں مختلف پیغام دیں گے تو سویڈن میں بڑی حیرانگی ہوگی۔ صدر اردوغان نے ان خیالات کا اظہار بلیجیک میں نوجوانوں کے ساتھ بات چیت کے دوران کیا۔ انہوں نے سویڈن اور فن لینڈ کی نیٹو رکنیت کے عمل پر تبصرہ کرتے ہوئے کہا کہ ہم نے (سویڈن سے) آپ کو 120 دہشت گردوں کی فہرست فراہم کی ہے اور آپ ان دہشت گردوں کو ہمیں واپس کر دیں گے تاکہ آپ نیٹو میں شامل ہو سکیں۔

اگر آپ ان دہشت گردوں کو ہمارے حوالے نہیں کرتے تو ہم پھر آپ کی نیٹو کی رکنیت کی حمایت نہیں کریں گے۔ انہوں نے اس روز ہم سے کیے گئے وعدے کی پاسداری کرنے کو قبول کرلیا لیکن بعد میں مختلف حیلے بہانے بنائے جانے لگے۔ جس پر ہم اگر ضروری ہوا تو فن لینڈ کے بارے میں ایک مختلف پیغام دے سکتے ہیں۔ جب ہم فن لینڈ کے بارے میں مختلف پیغام دیں گے تو سویڈن حیران رہ جائے گا۔ لیکن فن لینڈ کو کوئی ایسی غلطی نہیں کرنی چاہیے۔

روس اور ترکیہ کے تعلقات کا ذکر کرتے ہوئے صدر اردوغان نے کہا کہ روس کے ساتھ ہمارے تعلقات میں باہمی احترام موجود ہے۔ صدر پوتن کے ساتھ میرے تعلقات باہمی اعتماد پر مبنی ہیں۔ اگرچہ شام کی صورتِ حال کی وجہ سے اب تک کوئی مثبت پیش رفت نہیں ہوسکی ہے لیکن اب روس ، شام اور ترکیہ تینوں نے مذاکرات شروع کرنے کا فیصلہ کیا ہے۔ ہم اس میں ایران کو بھی شامل کر سکتے ہیں، ہم اپنے مذاکرات میں خطے میں امن کے قیام کے بارے میں بات چیت کریں گے، ہمارا مقصد علاقے میں امن قائم کرنا ہے اور خطے میں مشکلات دور کرنا ہے۔ اس سلسلے میں ہم نتائج حاصل کرنے کا سلسلہ جاری رکھے ہوئے ہیں۔ (یو این آئی)