واشنگٹن: امریکہ کی جارجیا اسمبلی نے 'ہندو فوبیا' کے خلاف مذمتی قرارداد منظور کی ہے۔ جارجیا ایسا قانونی اقدام اٹھانے والی پہلی امریکی ریاست بن گئی ہے۔ ہندو فوبیا اور ہندو مخالف جذبات کی مذمت کرتے ہوئے قرارداد میں کہا گیا ہے کہ ہندو مذہب دنیا کا سب سے قدیم مذہب ہے اور دنیا کے 100 سے زائد ممالک میں 1.2 بلین لوگ اس مذہب کو مانتے ہیں۔ قرارداد میں کہا گیا کہ یہ مذہب قبولیت، باہمی احترام اور امن کی اقدار کے ساتھ متنوع روایات اور عقائد کے نظام پر مشتمل ہے۔
یہ تجویز اٹلانٹا کی فورسائتھ کاؤنٹی سے تعلق رکھنے والے عوامی نمائندوں لارین میکڈونلڈ اور ٹوڈ جونز نے پیش کی تھی۔ اٹلانٹا میں ہندو اور بھارتی نژاد امریکی کمیونٹیز کی ایک بڑی تعداد رہتی ہے۔ قرارداد میں کہا گیا ہے کہ امریکی ہندو برادری نے مختلف شعبوں جیسے طب، سائنس اور انجینئرنگ، انفارمیشن ٹیکنالوجی، مالیات، تعلیم، مینوفیکچرنگ، توانائی اور خوردہ فروشی میں اہم کردار ادا کیا۔
اس میں کہا گیا ہے کہ یوگا، آیوروید، مراقبہ، خوراک، موسیقی اور فنون کے شعبوں میں کمیونٹی کی شراکت نے ثقافتی تانے بانے کو تقویت بخشی ہے اور اسے امریکی معاشرے میں بڑے پیمانے پر اپنایا گیا اور اس سے لاکھوں لوگوں کی زندگیوں میں بہتری آئی۔ تجویز میں کہا گیا کہ گذشتہ چند برسوں میں ملک کے مختلف حصوں میں ہندو امریکیوں کے خلاف نفرت انگیز جرائم کے کئی مقدمات درج کیے گئے ہیں۔ تجویز کے مطابق، کچھ ماہرین تعلیم نے ہندو فوبیا کو بھڑکایا ہے جو ہندو مذہب کو تباہ کرنے کی وکالت کرتے ہیں اور اس کی مقدس کتابوں اور ثقافتی روایتوں پر تشدد اور ظلم و ستم کو فروغ دینے کا الزام لگاتے ہیں۔