Nepal plane crash نیپال میں طیارہ حادثے کی جگہ سے اب تک 71 لاشیں برآمد

نیپال میں 15 جنوری کو پیش آنے والے طیارے حادثے کے مقام سے اب تک 71 افراد کی لاش برآمد کی جاچکی ہے جبکہ ایک اور شخص کی تلاش ابھی بھی جاری ہے۔ مسافر طیارہ میں 72 افراد سوار تھے۔

کھٹمنڈو: طیارہ حادثے کی جگہ سے ایک اور نیپالی مسافر کی لاش برآمد ہوگئی ہے جس کے ساتھ اب لاشوں کی تعداد 71 ہو گئی ہے تاہم آخری لاپتہ مسافر کی ابھی تک تصدیق نہیں ہو سکی ہے۔ کاسکی ضلع کے اسسٹنٹ چیف ڈسٹرکٹ آفیسر نے بتایا کہ ہمیں سیتی ندی میں ایک اور لاش برآمد ہوئی ہے۔ جس سے برآمد ہونے والی لاشوں کی مجموعی تعداد 71 ہو گئی ہے۔

یتی ایئر لائنز کا طیارہ 15 جنوری کو پوکھرا شہر میں دریائے سیتی کے قریب گر کر تباہ ہو گیا تھا، یہ طیارہ کھٹمنڈو سے پوکھرا جا رہا تھا۔ مسافر طیارہ جس میں 72 افراد سوار تھے، جن میں پانچ ہندوستانی بھی شامل تھے۔ اس سے قبل یتی ایئر لائنز کے طیارے کا بلیک باکس نیپال کی فوج نے سول ایوی ایشن اتھارٹی کے حکام کے حوالے کیا تھا۔بلیک باکس ایک فلائٹ ڈیٹا ریکارڈر ہے جو ایک خصوصی الگورتھم کے ذریعے پرواز کی تمام معلومات کو ریکارڈ کرتا ہے۔

اس سے قبل نیپال کی سول ایوی ایشن اتھارٹی نے بورڈ پر مسافروں کی ایک فہرست بھی جاری کی تھی، جس میں نیپال کے 53 شہری اور 15 غیر ملکی شامل ہیں، جن میں پانچ ہندوستانی، چار روسی، دو کوریائی اور ارجنٹینا، آسٹریلیا، فرانس اور آئرلینڈ کے ایک ایک شہری شامل ہیں۔ نیپال کی حکومت نے حادثے کی وجہ جاننے کے لیے ایک خصوصی کمیشن کو کام سونپا ہے جس کی رپورٹ 45 دنوں میں متوقع ہے۔