ترکی کرسکتا ہے روسی کورونا ویکسین کا تجربہ

روسی نائب وزیراعظم تتیانا گولیکووا نے بتایا کہ ستمبر میں مذکورہ ویکسین کی پروڈکشن کا عمل بھی شروع ہو جائے گا اور اکتوبر میں ملک بھر میں لوگوں کو اس کے ٹیکے لگائے جائیں گے۔

ترکی کے وزیر صحت فرحتین کوکا نے بدھ کو کہا کہ ترکی کے افسران جلد ہی عالمی وبا کورونا وائرس کے خلاف روسی ٹیکے کے تجربے کے لئے ایک پرمٹ جاری کرسکتے ہیں۔

کوکا نے کہا کہ ' روس کے تیار کردہ کورونا ویکسین کا تجربہ کرنے کی ہمیں درخواست ملی ہے۔ جلد ہی ہم اس سلسلے میں ایک پرمٹ جاری کریں گے۔ اس کے علاوہ ملک میں دو الگ الگ ویکسین پر ٹرائل بھی چل رہا ہے۔'

انہوں نے کہا کہ ویکسین کو فروغ دینے کے لئے خاص طور پر رضا کاروں پر ترکی میں اس طرح کے تجربے کئے گئے ہیں۔

واضح رہے کہ روس کورونا ویکسن تیار کرنے والا پہلا ملک بن گیا ہے۔ روسی صدر ولادمیرپوتین نے ملک میں کورونا وائرس ویکسن کی تیاری کی اطلاع دیتے ہوئے کہا تھا کہ ویکسن کا رجسٹریشن کیا گیا جبکہ ان کی ایک لڑکی نے پہلا ٹیکہ لیا ہے۔