شامی صدر بشار الاسد اور ان کی اہلیہ کورونا مثبت

شام کے صدر بشار الاسد کے دفتر کا کہنا ہے کہ دونوں کی طبیعت ٹھیک ہے اور وہ گھر میں قرنطینہ میں رہ کر کام کرتے رہیں گے۔

شام کے صدارتی دفتر کے ایک بیان کے مطابق، شام کے صدر بشار الاسد اور ان کی اہلیہ اسماء نے کورونا کی علامات ظاہر ہونے کے بعد کووڈ-19 ٹیسٹ کرایا جس کے بعد ان کی رپورٹ مثبت آئی ہے۔

شامی صدر بشار الاسد کے دفتر کا کہنا ہے کہ اس جوڑے کی طبیعت ٹھیک ہے اور وہ گھر میں ہی دو سے تین ہفتوں تکقرنطینہ میں رہ کر کام کرتے رہیں گے۔

فروری کے وسط سے ہی جنگ زدہ شام میں کورونا وائرس میں اضافہ ہوا ہے۔ لیکن ملک کی شدید معاشی صورتحال کی وجہ سے لاک ڈاؤن کے اختیارات محدود ہیں۔ یہ بات ملک کی کورونا وائرس کی مشاورتی کمیٹی کے ایک ممبر نے بتائی۔

الاسد کی حکومت نے یکم مارچ سے فرنٹ لائن ہیلتھ کیئر ورکرز کو کورونا کا ٹیکہ لگانے کا کام شروع کر دیا ہے۔

شام میں کورونا وائرس کے آغاز کے بعد سے اب تک سرکاری طور پر 15،981 کورونا کیسز اور 1،063 اموات ریکارڈ کی گئی ہیں۔ تاہم، خیال کیا جاتا ہے کہ حکومت کی محدود ٹیسٹ کی وجہ سے اصل تعداد بہت زیادہ ہے۔