اسرائیل فائزر ویکسین کی سات لاکھ خوراکیں جنوبی کوریا بھیجے گا

اسرائیلی وزیر اعظم نے اسے اپنی نوعیت کا پہلا معاہدہ قرار دیتے ہوئے اس کو ''جیت کا سودا'' قرار دیا ہے۔

اسرائیل نے جنوبی کوریا کے ساتھ جلد ہی میعاد ختم ہونے والے فائزر بائیو انٹیک کی کورونا وائرس ویکسین کی 700,000 خوراکیں بھیجنے کے معاہدے پر دستخط کیے ہیں جس کے تحت جنوبی کوریا بعد میں اتنے ہی ویکسین واپس لوٹائے گا۔

اسرائیلی وزیر اعظم نفتالی بینیٹ نے منگل کو بتایا 'اسرائیل ایک معاہدے کے مطابق جولائی کے آخر تک فائزر ویکسین کی تقریبا 700,000 خوراکیں جنوبی کوریا بھیجے گا۔ اس کے بدلے میں جنوبی کوریا ستمبر تا اکتوبر میں اسرائیل کو اتنی ہی ویکسین واپس کرے گا'۔

اسرائیلی وزیر اعظم نے اسے اپنی نوعیت کا پہلا معاہدہ قرار دیتے ہوئے اس کو '' جیت کا سودا '' قرار دیا ہے۔

جنوبی کوریا میں پہلے ہی 1.53 کروڑ سے زیادہ افراد کورونا ویکسین کی پہلی خوراک لے چکے ہیں اور پچاس لاکھ سے زائد افراد نے دوسری خوراک لی ہے۔ تاہم، ان میں زیادہ تر طبی کارکن، بزرگ، فوجی، اساتذہ اور سفارتکار شامل ہیں۔ ابھی ملک میں 20-50 سال کی عمر کے شہریوں کے لیے ویکسینیشن شروع ہونا باقی ہے۔